2026 жыл басында әлемде әуе жолаушылары тасымалы 4 пайызға жуық өсті

2026 жылдың басында әлемдік авиация нарығы тұрақты өсім көрсетті. Жолаушылар тасымалы да, жүк сегменті де оң динамиканы сақтап отыр, деп хабарлады Халықаралық әуе көлігі қауымдастығы (IATA). 

Жолаушылар тасымалы. IATA мәліметінше, 2026 жылдың қаңтарында жалпы жолаушылар сұранысы (RPK) өткен жылдың сәйкес кезеңімен салыстырғанда 3,8%-ға артты. Оның ішінде халықаралық бағыттар 5,9%-ға өссе, ішкі рейстердегі өсім небәрі 0,1%-ды құрады. Жалпы сыйымдылық 3,5%-ға ұлғайып, ұшақтардың жүктелу коэффициенті 82,0%-ға жетті. Бұл қаңтар айы үшін рекордтық көрсеткіш саналады.

IATA деректері негізгі трендтердің оң күйінде қалғанын көрсетеді. Наурыз айына қарай әлемдік сыйымдылық 5,2%-ға дейін өсуі мүмкін. Бұл – 2024 жылдың сәуірінен бергі ең жоғары қарқын болмақ.

Өңірлік бөліністе халықаралық сұраныстың ең жоғары өсімі Африкада (+11,7%) және Латын Америкасында (+11,4%) тіркелді.

"Қаңтардағы салыстырмалы баяу өсімге қарамастан, негізгі көрсеткіштер берік, және 2026 жылы сұраныс тұрақты өсімін жалғастырады деп күтеміз", – деді IATA бас директоры Уилли Уолш. 

Жүк тасымалы. Әуе жүк тасымалына сұраныс (CTK) бір жылда 5,6%-ға артты. Халықаралық сегментте өсім 7,2%-ды құрады. Сыйымдылық 3,6%-ға ұлғайып, жүктелу коэффициенті 45,1%-ға жетті.

Ең жоғары өсім Африкада (+18,2%) және Таяу Шығыста (+9,3%) тіркелді. Ал Солтүстік Америкада (−0,5%) және Латын Америкасында (−2,0%) төмендеу байқалды.

Негізгі сауда бағыттарының басым бөлігінде жүк көлемі артқанымен, Азия — Солтүстік Америка бағыты (−0,6%) ерекшелік болды.

"Жүк тасымалы нарығы 2026 жылды сенімді өсіммен бастады, алайда өңірлік динамика әркелкі. Алдағы айларда нарықтың даму бағыты геосаяси жағдай мен сауда саясатының өзгерістеріне байланысты болады", – деді Уилли Уолш. 

Сарапшылардың бағалауынша, 2026 жылы авиация нарығы жаһандық экономикалық ахуал мен халықаралық сауда үрдістеріне тәуелді болмақ. Дегенмен, жылдың басындағы көрсеткіштер саладағы іргелі сұраныстың сақталғанын аңғартады.