Қытай Айға алғашқы ғарышкерлерін қондыру жоспарын жария етті

Қытай 2030 жылға дейін алғашқы ғарышкерлерін Айға қондыруды жоспарлап отыр. Ел билігі тарихи миссияның қалай жүзеге асатынын жариялады. "Синьхуа" агенттігінің мәліметінше, миссия "екі ұшыру – бір қону" қағидаты бойынша ұйымдастырылады.

Айды зерттеу бағдарламасының бас конструкторы Ван Сянның айтуынша, алдымен "Чанчжэн-10" зымыран-тасығыштарының көмегімен Айға қону модулі "Ланьюэ" және экипаж басқаратын "Мэнчжоу" ғарыш кемесі ұшырылады. Екі аппарат Ай орбитасында түйісіп, бір-бірімен жалғанады. Осыдан кейін ғарышкерлер қону модуліне ауысып, Ай бетіне қадам басады.

Экипаж құрамында үш адам болады. Алайда олардың екеуі ғана Ай бетіне қонады. Ғарышкерлердің міндеті – ғылыми зерттеулер жүргізу. Миссия аяқталған соң олар қайтадан өздігінен басқарылатын ғарыш кемесіне оралып, Жерге оралады.

Миссияға дайындық барысында Қытай Ай орбитасында технологияларды тексеру үшін үш ұшқышсыз сынақ өткізеді. Одан кейін экипаж қатысатын Айға қону миссиясы жүзеге асырылады.

Зымырандардың бәрі Хайнань аралының оңтүстігінде орналасқан Вэньчан ғарыш айлағынан ұшырылады.