+5…+9°
Қазақстанда алғаш рет әйел әскери қызметші Ұлттық ұланның "Бүркіт" арнайы жасағының құрамына қабылданды. Қымбат есімді жауынгердің лақап аты – "Китана". Бұл туралы Ұлттық ұланның баспасөз қызметі хабарлады.
Қымбаттың жауынгерлік қабілеті Дубайда өткен SWAT Challenge халықаралық жарысында байқалған. Ол жарыс кезінде мергендігімен ерекшеленіп, арнайы жасақ жауынгерлерінің назарын аударған.
"Қымбат – қоян-қолтық ұрыстан Қазақстанның алты дүркін чемпионы, джиу-джитсудан үш дүркін әлем чемпионы. Спорттағы жетістіктері мен жауынгерлік дайындығы оның арнайы жасақ құрамына қабылдануына жол ашқан", – делінген хабарламада.
Қазір Қымбат крап беретін алу үшін арнайы сынаққа дайындалып жатыр. Сынақтан сәтті өтсе, ол Ұлттық ұлан тарихында бұл ерекше белгіні иеленген алғашқы әйел атанбақ.