Каспийдегі трагедияға байланысты 8 лауазымды тұлға қамауда жатыр. Олар кімдер

Бас прокуратураның баспасөз қызметі Каспий теңізінде әскери қызметшілердің қаза табуына байланысты кімдер сот санкциясымен қамауға алынғанын хабарлады. 

Олар:

• Қарулы күштердің Әскери-теңіз күштерінің бас қолбасшысы;
• оның бірінші орынбасары мен жауынгерлік даярлық жөніндегі орынбасары;
• екі әскери бөлімнің командирлері;
• теңіз жаяу әскері батальоны мен ротасының командирлері;
• катер капитаны.

"Ішкі істер министрлігінің әскери-тергеу органдары Маңғыстау облысында оқу-жаттығу кезінде әскери қызметшілердің қаза табу дерегі бойынша қылмыстық істі тергеудіжалғастырып жатыр. Қайғылы оқиғаның барлық мән-жайын жан-жақты әрі объективті анықтау үшін кешенді тергеу әрекеттері жүргізілді. Қазірге дейін 300-ден астам адамнан жауапалынып, 30-дан астам сот сараптамасы мен зерттеу жүргізілді", – делінген ресми хабарламада. 

Қылмыстық-процестік кодекстің 201-бабына сәйкес сотқа дейінгі тергеп-тексерудің өзге деректерін жария етуге болмайды. Жақын арада тергеу әрекеттерін аяқталып, қылмыстық процеске қатысушыларды іс материалдарымен таныстыру юасталады. 

Еске салайық, 24 қыркүйекте Каспий теңізінде өткен оқу-жаттығу кезінде ауа райының нашарлап, желдің күшеюіне байланысты теңізге 17 әскери қызметші ағып кеткен. Олардың 14-і қаза тауып, үшеуі аман қалды. 25 қыркүйек Қазақстанда жалпыұлттық аза тұту күні болып жарияланды.

Осы оқиғаға байланысты екі қылмыстық іс қозғалды. Олар Қылмыстық кодекстің 453-бабының 2-бөлігі ("Ауыр зардаптарға әкеп соққан қызметке салғырт қарау") және 465-бабы ("Кеме жүргізу қағидаларын бұзу") бойынша тергеліп жатыр. 25 қыркүйекте Қорғаныс министрлігі жүйесіндегі бес лауазымды тұлғаның ұсталғаны хабарланды. Ал 6 қазанда Әскери-теңіз күштерінің бұрынғы бас қолбасшысы қамауға алынды.

26 қыркүйекте президент Қорғаныс министрлігінде кешенді тексеру жүргізуді тапсырды. Келесі күні Қасым-Жомарт Тоқаев жаңа министрді тағайындау туралы жарлыққа қол қойды. Бұл қызметке Айдос Мырзахметов тағайындалды. 28 қыркүйекте ол Қазақстан Қарулы күштерін реформалаудың негізгі міндеттерін жариялады.