+6…+15°
Қазақстандағы ең ұзақ жасаған тұрғындардың бірі Түймегүл Темірбаева 116 жасында өмірден өтті. Оның қайтыс болғанын Ұлытау облысы Жаңаарқа ауданының әкімдігі мәлімдеді.
Түймегүл Темірбаева 1910 жылғы 1 қаңтарда Жамбыл облысы Байқадам ауданында дүниеге келген. 22 жасында Аязбай Темірбаевпен шаңырақ көтеріп, кейін жұбайымен бірге Жаңаарқа ауданына қоныс аударған. Ол осы өңірде 90 жылдан астам уақыт өмір сүрді.
Ерлі-зайыпты төрт бала тәрбиелеп өсірген. Түймегүл Темірбаева 15 немере, 25 шөбере сүйген. Жұбайы да ұзақ ғұмыр кешіп, 96 жасында қайтыс болған.
Ұлытау облысының әкімдігі марқұмның туған-туыстары мен жақындарына көңіл айтты. Әкімдік өкілдері Түймегүл Темірбаеваның ғұмыр жолы бір ғасырлық тарихпен тұспа-тұс келгенін атап өтті. Сондай-ақ оның ұрпағына өнеге болғанын, елдегі маңызды оқиғаларға бейжай қарамай, қоғамдағы жаңалықтарды үнемі қадағалап отырғанын еске алды.
Айта кетейік, бұған дейін Қазақстанда жасы 100-ден асқан 423 адам тұратыны хабарланған еді. Сол кезде ең ұзақ жасаған тұрғын Ұлытау облысында тұратыны айтылған.