"Информбюро" телебағдарламасы өзінің 30 жылдығына орай Алматыға шахмат алаңын сыйға тартты

Алматыдағы Тереңқұрда жаңа шахмат алаңы ашылды. Бұл – 31 арнаның "Информбюро" ақпараттық бағдарламасының өзінің 30 жылдығына орай қалаға жасаған сыйы. 

Енді бұл алаңда орнатылған арнайы үстелдерде кез келген адам шахмат ойнай алады. Алаңның ашылу салтанатында балалар үшін кәсіби шахматшылармен бір мезетте шахмат ойыны ұйымдастырылды. Оған Қазақстан шахмат федерациясының атқарушы директоры, әйелдер арасындағы гроссмейстер Гүлмира Дәулетова және Қазақстан тарихындағы ең жас гроссмейстер, 16 жасқа дейінгі жасөспірімдер арасындағы әлем чемпионы Эдгар Мамедов қатысты.

"31 арна" бас директоры Айгүл Ақсамбиева қалаға сыйлық жасау идеясы туғанда таңдау неліктен дәл шахмат алаңына түскенін түсіндірді.

"Информбюро" – ой үстінде жүретін адамдарға арналған бағдарлама болғандықтан, біз шахмат ойнайтын кеңістік жасауды ұйғардық. Біздің көрермендеріміз қорытындыны өзі жасайды. Сәйкесінше, шахмат та – өз бетінше қорытынды жасауға баулитын өнер. Бұл алаң – адамдардың "Информбюромен" эфир арқылы ғана емес, өмірде де кездесетін алғашқы орны болмақ және бұл үрдіс әрі қарай жалғасады деп үміттенемін", – деді Айгүл Ақсамбиева.

Оның айтуынша, бұл жоба "31" медиахолдингінің жастар мен аға буын өкілдерін біріктіретін зияткерлік демалысты дамытуға қосқан үлесі болды.

Шахмат алаңы Тереңқұрдың Әбділда Тәжібаев пен Армянская көшелерінің арасындағы бөлігінде орналасқан. Тауды бетке алып жүрсеңіз, шахмат кеңістігін балалар ойын алаңынан кейін, "Алтыбақан" әткеншектерінің жанынан табасыз.

Медеу ауданы әкімінің аппараты абаттандыру бөлімінің басшысы Абылай Мәкейдің айтуынша, Тереңқұрдың бұл бөлігі арқылы күн сайын мыңға жуық адам өтеді. Таңертең мұнда жүгіруді ұнататындар келсе, күндіз қарт қала тұрғындары серуендейді, ал кешке отбасылар балаларымен бірге уақыт өткізеді. Бұған дейін бұл жерде арнайы шахмат алаңы болмаған.

"Бұл алаң күн сайын отбасымен бірге уақыт өткізетін қала мен аудан тұрғындарының басын қосатын орынға айналады деп ойлаймын. Бұл телеарна тарапынан жасалған өте жақсы бастама болды", – деді Абылай Мәкей.

Эдгар Мамедов өзінің туған жері Ақтаудағы осындай алаңның шахматшы ретінде дамуына ықпал еткенін айтты.

"Біздің жағалауда осындай шахмат бұрышы ашылған кезде, мен ол жерде көп ойнадым, шеберлігімді шыңдадым және жаңа достар таптым. Мұндай алаңдар шахматты кеңінен насихаттауға көмектеседі: адамдардың көбі шахмат ойнай бастайды, ал олардың кейбірі кейін бұл спортпен кәсіби түрде айналысады", – деді Эдгар Мамедов.

Қазақстан шахмат федерациясы Тереңқұрдағы жаңа алаң басқа балаларға да осындай мүмкіндік береді деп отыр.

"Бұл кеңістік балаларға, шахмат әуесқойлары мен ардагерлерге күн сайын шахмат ойнап, шеберлігін жетілдіруге және болашақ жеңістерге дайындалуға мүмкіндік береді. Бәлкім, дәл осы жерден болашақ әлем чемпиондарының шахматтағы жолы басталар", – деді федерацияның атқарушы директоры Гүлмира Дәулетова.