Ашық НҚА порталында мектептің бастауыш сыныптарынан бөлім жиынтық бағалау мен тоқсандық жиынтық бағалау сынақтарын алып тастау бойынша оқу-ағарту министрінің бұйрығына өзгерістер енгізу мәселесі онлайн талқылауға ұсынылды.
"Бұйрық жобасына білім алушылардың оқу жетістіктерін бағалау тәртібіне қатысты өзгерістер енгізілді. Аталған өзгерістерге сәйкес, 2-4-сыныптарда бағалау қалыптастырушы бағалау, тақырыптық және қорытынды бақылау арқылы, ал 5-11 (12)-сыныптарда қалыптастырушы және жиынтық бағалау (БЖБ, ТЖБ) арқылы жүзеге асырылады. Тоқсандық бағалар бағалау нәтижелері негізінде қойылып, білім алушылардың оқу жетістіктерін объективті бағалауды қамтамасыз етуге бағытталған", – делінген сайттағы хабарламада.
Еске салайық, оқу-ағарту министрі Жұлдыз Сүлейменова ата-аналардан бұл сынақ түрлерін алып тастау жөнінде жиі өтініш түсетінін айтып, кейін әзірге оларды тек бастауыш сыныптардан алып тастау жөнінде бастама көтерді.
"Критериалды бағалау жүйесі енгізілген көптеген дамыған елдерде бастауыш сыныптарда мұндай бағалау түрлері қолданылмайды. Сондықтан қазіргі уақытта Оқу-ағарту министрлігі бастауыш сыныптарда бөлім бойынша және тоқсандық жиынтық бағалауды алып тастау мәселесін талқылап жатыр", – деді министр.
"Мұғалім бір жылда 4 мыңға жуық ақ қағаз жұмсайды". Жұлдыз Сүлейменова БЖБ мен ТЖБ туралы
БЖБ мен ТЖБ-ны алып тастау: Мәселе тамыз кеңесінде қаралады