Оқу-ағарту министрі Жұлдыз Сүлейменова Facebook мектептің бастауыш сыныптарынан БЖБ, ТЖБ сынақтарын алып тастау бастамасы туралы тағы да хабарлады.
Министрдің айтуынша өткен аптада бүкіл Қазақстан бойынша бастауыш сынып мұғалімдерінің қатысуымен осы мәселе бойынша талқылау өтіп, онда мұғалімдер бұл бастаманы құптаған.
"Мәселен, бастауыштың 2 сыныбындағы БЖБ мен ТЖБ-ның саны шамамен 54. Бастауыш мұғалімі бір жыл бойы осы БЖБ, ТЖБ өткізу үшін шамамен 4 мыңға жуық ақ қағаз жұмсайды. Ал осы қағаздарды тексеруге орташа есеппен 112 сағат уақыты кетеді. Біз енді балалардың когнитивті дамуын күшейтетін, бала өз қолымен жазатын диктант, бақылау жұмыстарын қарастырып отырмыз. Біз БЖБ және ТЖБ жұмыстарын бастауыш сыныптардан алып тастау бойынша жұмысты бастадық", – деді Жұлдыз Сүлейменова.
Еске салайық, министр бұған дейін БЖБ мен ТЖБ-ны алып тастау мәселесі Тамыз кеңесінде қаралатынын айтқан болатын.
БЖБ мен ТЖБ-ны алып тастау: Мәселе тамыз кеңесінде қаралады
Оқу министрлігі БЖБ мен ТЖБ-ны тек бастауыш сыныптардан алып тастауды қарастырып отыр