Қазақстанның Жеңіл атлетика федерациясы XX жазғы Азия ойындарында алтын медаль алып, алайда кейін жарыстан шеттетілген Ясмина Тоқсанбаеваға қатысты мәлімдеме жасады.
"Қазіргі уақытта қабылданған шешімге қатысты федерация атынан наразылық білдіріліп, тиісті шағым жіберілді. World Athletics ұйымының рұқсат етілген аяқ киімдер тізімінде ASICS бренді көрсетілген. Алайда Ясмина жарыста пайдаланған аяқ киімнің нақты моделі аталған тізімде болмаған. Сонымен қатар жарыс басталғанға дейін спортшының аяқ киімі тексеріліп, жарысқа қатысуына рұқсат берілген. Осыған байланысты федерация Ясминаның құқықтары мен мүддесін қорғау жұмысын әрі қарай жалғастырады", – делінген ресми мәлімдемеде.
Бұл ретте федерация өз жауапкершілігін де жоққа шығармайтынын хабарлады.
"Біздің жіберген шағымымыз бен наразылығымыздың нәтижесіне қарамастан, чемпионға тиесілі барлық сыйақы Федерацияның өз қаражаты есебінен толық көлемде төленеді", – деп жазды федерация өкілдері.
Азия ойындарындағы кроссовка дауы: Атлет Ясмина Тоқсанбаева неге алтын медалінен айырылды