Шымкентте полиция синтетикалық есірткінің ірі партиясын оңтүстік өңірлерге жеткізбек болған ерлі-зайыптыны ұстады. Күдіктілердің көлігінен жалпы салмағы екі келіге жуық мефедрон тәркіленіп, олар уақытша ұстау изоляторына қамалды, деп хабарлайды ПД баспасөз қызметі.
Тергеу мәліметінше, Қарағанды қаласының 48 жастағы тұрғыны мен оның 37 жастағы жұбайы синтетикалық есірткіні Алматыдан Шымкентке жеткізіп, кейін оны еліміздің оңтүстік өңірлерінде таратуды жоспарлаған.
Автокөлікті тексеру барысында жүксалғыштан герметикалық қапталған төрт орама мефедрон табылды. Оның жалпы салмағы шамамен екі келіні құрайды.
Полицияның мәліметінше, күдіктілердің ұялы телефондары тексерілген кезде интернет арқылы жұмыс істейтін есірткі дүкенінің кураторымен жазысқан хат-хабарлары анықталған. Сондай-ақ есірткіні тасымалдағаны үшін криптовалюта арқылы төленген сыйақылар туралы деректер табылған.
Жауап алу барысында ерлі-зайыпты өз кінәсін толық мойындаған. Медициналық куәландыру қорытындысы бойынша ер адамның каннабис тобына жататын есірткі заттарын пайдаланғаны расталды.
Полицияның хабарлауынша, қамқорлығында үш кәмелетке толмаған баласы болғанына қарамастан, күдіктілер заңсыз табыс табу жолын таңдаған. Тергеу жалғасып жатыр.