Медаль үшін 126 млн теңге сұраған Мәдениет министрлігі Жоғары аудит палатасының сынына қалды

Мәдениет және спорт министрлігі алдағы үш жылға арналған бюджеттен тек медаль, диплом және кубок әзірлеуге 126 млн теңгеден астам қаржы сұратқан. Осы орайда, жоғары аудит палатасы ведомствоның медаль тарататын мекемеге айналмауы керектігін ескертті, деп хабарлайды 31 арнаның "Информбюро" ақпараттық бағдарламасы. 

Аудиторлық палата мәліметінше, жыл сайын марапаттарға 42 млн теңгеден астам сома жұмсалады. Палата өкілдері елде мұнша медаль алатын мәденит қызметкерлері мен спортшылардың жоқ екенін айтты. Алайда, Мәдениет министрлігі Қазақстандағы 176 спорт түрі бойынша өтетін жарыстардың саны айтарлықтай көп екенін алға тартып отыр. 

---

Оқи отырыңыз: Қытай сыбайлас жемқорлықпен қалай күресті?

---

"2022 жылғы 1 сәуірде ұлттық олимпиада комитеті спортты дамыту дирекциясына Олимпиада спорт түрлерін дамыту қызметін берді. Бұл өз кезегінде республикалық іс-шаралар санын арттырып, жарыс жеңімпаздары мен жүлдегерлерін марапаттау үшін сатып алатын өнімдердің ұлғаюына алып келеді", – деді мәдениет және спорт министрлігі спортты дамыту дирекциясының қаржы басқармасы басшысының міндетін атқарушы Нұрлан Жетібаев.