Абай облысының Мақаншы ауданында Қабанбай ауылынан 22 шақырым жерде құрғақ шөп пен қамыс өртеніп жатыр. Өртті сөндіруге 100-ден астам адам мен 27 техника жұмылдырылған. Бұл туралы Төтенше жағдайлар министрлігі хабарлады.
ТЖМ мәліметінше, өрт батпақты аумақта тұтанған. Қатты жел, жердің батпақты болуы және кей жерлерде биіктігі үш метрге жететін қалың қамыс өртті сөндіру жұмыстарын қиындатып отыр.
Оқиға орнында Төтенше жағдайлар министрлігінің бөлімшелері, "Ауыл құтқарушылары" еріктілері және жергілікті атқарушы органдардың өкілдері жұмыс істеп жатыр.
Жалынның тұрғын үйге таралуына жол берілмеді
Өрт сөндірушілер жалынның шаруа қожалығындағы тұрғын үйге және көлемі шамамен 30 тонна болатын жиналған шөпке таралуына жол бермеді.
ТЖМ мәліметінше, әзірге елді мекендерге қауіп төніп тұрған жоқ. Жағдай ведомствоның бақылауында, өртті сөндіру жұмыстары жалғасып жатыр.