Белгілі стенд-ап комик Нұрлан Сабуров тағы да даудың ортасында қалды. Бұл жолы мәселе әзілге емес, салық төлемдеріне қатысты болып отыр, деп хабарлады 31 арнаның Информбюро ақпараттық бағдарламасы.
Ресейдің салық қызметі комикке тиесілі "Сабр Продакшн" компаниясында заңбұзушылықтарды анықтаған. Мәліметтерге сәйкес, компания табыс тапқанына қарамастан шамамен 800 мың рубль көлемінде салық төлемеген. Бұл сома теңгемен есептегенде 5 миллионға жуық қаражатты құрайды.
Сонымен қатар, фирманың заңды мекенжайы нақты орналасқан жеріне сәйкес келмейтіні де белгілі болған. Егер анықталған бұзушылықтар уақытылы жойылмаса, компанияға айыппұл салынып, кейін қызметі толық тоқтатылуы мүмкін.
Айта кетейік, бұған дейін Нұрлан Сабуровқа Ресей аумағына кіруге тыйым салынғаны хабарланған еді.