"Қазақстан барысы" республикалық турнирі көрерменсіз өтеді, деп хабарлады Қазақ күресін қолдау және дамыту қоры.
"Осыған дейін хабарлағанымыздай, Нұр-Сұлтан қаласы әкімдігінің келісімімен 20 пайыз көрерменге рұқсат алған болатынбыз. Алайда, дәл бүгінгі жағдай бойынша, Нұр-Сұлтан қаласында санитарлық-эпидемиологиялық жағдайдың нашарлауына, сондай-ақ, елорданың "қызыл аймақта" болуына байланысты турнирге көрермен кіре алмайтынын хабарлаймыз", – делінген Қордың баспасөз қызметі таратқан ақпаратта.
Турнир Qazaqstan және Qazsport телеарналары арқылы тікелей эфирде көрсетіледі.
Оқи отырыңыз: "Қазақстан барысы" республикалық турнирі елордада 4 шілдеде өтеді
Айта кетейік, қазақ күресінен "Қазақстан барысы" республикалық турнирі 4 шілде күні Нұр-Сұлтан қаласы, Жақсылық Үшкемпіров атындағы жекпе-жек сарайында өтеді. Нұр-Сұлтан, Алматы, Шымкент қалалары мен облыстарда өткен іріктеу жарыстарынан 37 балуан жолдамаға ие болды.
Жеңімпаз атанған балуанға 25 миллион теңге және алтын белбеу мен алтыннан құйылған ауыспалы "тайтұяқ" табысталады. Екінші орынға 5 500 000 теңге және үшінші орынға 1 800 000 теңге табысталып, жүлдегерлер күміс және қола белбеумен марапатталады.
