Алматы облысы Қарасай ауданындағы мешітте сабақ берген мұғалім оқушыларды ұрғаннан кейін жұмыстан босатылды. Қазір полиция бұл факті бойынша қылмыстық істі тергеп жатыр.
Әлеуметтік желілерде ер адамның балаларды бірнеше рет ұрған видеосы тарады. Жазбада кадрлар Қарасай ауданындағы мешітте сабақ өтіп жатқан кезде түсірілгені және видеодағы адамның діни сауаттылық курсының мұғалімі екені айтылған.
Алматы облысындағы Қазақстан мұсылмандары діни басқармасы өкілдігінің баспасөз қызметі видеожазбаның 2026 жылдың маусым айының басында түсірілгенін растады. Сабақтар Қарасай ауданындағы "Түркістан-1" мешітінде өткен.
"Оқиғадан кейін мешіт мұғалімі Дүйсенхан Нұрберді балаларды тәртіпке шақыру кезінде эмоцияға беріліп, педагогикалық әдеп нормаларына және мұғалім қызметіне қойылатын талаптарға сай келмейтін әрекетке жол берген", – делінген ҚМДБ-ның ресми мәлімдемесінде.
ҚМДБ мәліметінше, оқиға белгілі болғаннан кейін арнайы жиналыс өткізілген. Мұғалім өз қателігін мойындап, өкініш білдіріп, ата-аналардан кешірім сұраған.
"Ата-аналардан осы жағдайға байланысты ешқандай талап-арыз бен шағымы жоқ екені туралы жазбаша өтініштер және бейнежазбалар алынды. ҚМДБ-ның №2290 бұйрығына сәйкес Дүйсенхан Нұрберді мешіт мұғалімі қызметінен босатылды", – деп хабарлады ҚМДБ өкілдері.
Сонымен қатар полиция кәмелетке толмаған балаларды ұрып-соғу фактісі бойынша қылмыстық іс қозғаған.
Алматы облысының полиция департаменті видеожазбаның әлеуметтік желілерге мониторинг жүргізу кезінде анықталғанын хабарлады.
"Оқиғаның биыл 2 маусымда Қаскелең қаласындағы мешіт аумағында болғаны анықталды. Кәмелетке толмаған балалармен және олардың ата-аналарымен қажетті процессуалдық әрекеттер жүргізіліп жатыр. Тергеу бақылауда. Мұғалімнің әрекетіне заңға сәйкес құқықтық баға беріледі", – делінген полицияның хабарламасында.
Астанада мешітте намаз оқып жатқан тұрғынның телефонын ұрлаған ер адам ұсталды 
Қазақстандықтардың қанша пайызы мешітке жиі барып тұрады