Астана қаласында полиция қызметкерлері мешіт аумағында ұрлық жасады деген күдікпен 36 жастағы ер адамды анықтап, қолға түсірді. Бұл туралы Polisia.kz хабарлады.
Алдын ала мәліметтер бойынша, ұсталған азамат мешітте түнеп жүрген. Ол келушілердің бірі намаз оқып жатқан сәтті пайдаланып, еденде қараусыз тұрған барсетканың ішінен iPhone 13 телефонын жасырын түрде жымқырып, оқиға болған жерден бой тасалаған. Бейнебақылау камераларының көмегімен күдіктінің жеке басы анықталып, жедел-іздестіру іс-шаралары барысында ол елорда көшелерінің бірінде ұсталды.
Ұрланған ұялы телефон тәртіп сақшыларымен тәркіленіп, заңды иесіне қайтарылды. Қазіргі уақытта аталған факті бойынша сотқа дейінгі тергеу амалдары жүргізіліп жатыр.
Оқи отырыңыз: Математикадан тарихқа дейін: Қазақстандағы мектеп оқулықтарынан 700-ден астам қате табылды
Полиция департаменті азаматтарға өз мүлкіне мұқият болуды және қоғамдық орындарда бағалы заттарды қараусыз қалдырмауды қатаң ескертеді.