Тікелей эфир

Пітір мен підия. Рамазан айында берілетін садақалар қандай?

Фото: depositphotos.com
Фото: depositphotos.com
2023 жылғы пітір садақа сомасы – 535 теңге, ал підия мөлшері – 3 мың теңгені құрайды.

Ислам дінінде мұсылмандар жағдайы жоқ жандарға, кедейлерге, қарызға батқандарға, Алла жолында қызмет етіп жүрген азаматтарға, ақшасы таусылып, жолда қалып қойған жолаушыларға, яғни көмекке зәру адамдарға садақа береді. Алайда денсаулыққа зиян келтіретін арақ-шарап, ұрлап алған не тартып алған пайдасыз заттарды садақаға беруге болмайды. Садақаны адал еңбекпен тапқан табысынан шын жүректен берген дұрыс.

Осы орайда Информбюро порталы Рамазан айында берілетін пітір садақа мен ораза ұстауға әл-қуаты жетпейтін адамдар беретін підияның маңызын түсіндіреді. 

Пітір садақасы

Рамазан айында жаңа туған сәбиден қартқа дейін жағдайы келетін әрбір мұсылман пітір садақасын береді. 2023 жылғы Рамазан айындағы бір адам үшін берілетін пітір садақа мөлшері 2 келі ұнның нарықтық орташа бағасымен есептеліп, 535 теңге етіп белгіленді. Пітір садақасын құрма, мейіз, арпа бағасымен де беруге болады: 

  • Бидай (2 кг) – 340 теңге;
  • Ұн (2 кг) – 535 теңге;
  • Арпа (4 кг) – 520 теңге;
  • Мейіз (2 кг) – 4270 теңге;
  • Құрма (4 кг) – 8090 теңге.

"Қазіргі таңда бидайдың өзі емес, ұн, талқан секілді оның өнімдері кең қолданылады. Сол себепті Қазақстан мұсылмандары діни басқармасы пітір садақаның құнын ұнмен есептеуді негізге алады. Өйткені, шариғатта бидаймен қатар оның өнімдерімен де пітір садақа беруге рұқсат етіледі", – деді ҚМДБ төраға орынбасары Сансызбай Шоқанов.


Оқи отырыңыз: 2023 жылғы пітір садақа мөлшері 535 теңге болып белгіленді


Ал бай, ауқатты адамдар пітір садақаны 2 келі мейізбен (4270 теңге) немесе 4 келі құрмамен (8090 теңге) бергені жақсырақ. Қайтыс болған адамдарға, ана құрсағындағы балаға пітір садақа берілмейді. 

Рамазан айының пітір садақасын Қадір түнінен бұрын немесе кейін берсін деген ереже жоқ. Дегенмен пітір садақаны ораза басталғаннан айт намазына дейін берген жөн. Одан кейін берілген пітір садақа жәй садақа болып қалады. 

"Мешітке түскен қаражат мүфтият бекіткен арнайы жарғы негізінде жұмсалады. Қаражат қайырымдылыққа жұмсалады. Рамазан айындағы пітір садақасы мешіт тізіміне тіркелген көмекке мұқтаж отбасыларға, жетімдерге, жалғызбасты аналарға арнайы тексеру комиссиясының шешімімен заттай немесе қаржылай беріледі", – делінген ҚМДБ мәлімдемесінде. 

Пітір садақаны мешітте ғана емес, Kaspi.kz, Halyk Homebank, Fortebank, Банк Центркредит, Astana-plat, Bereke Bank мобильді қосымшалары арқылы төлеуге болады. 


Оқи отырыңыз: ҚМДБ Рамазан айында жасалуы тиіс бес амалды хабарлады


Підия

Ислам дінінде бұйырылған белгілі бір құлшылықтың орнына төлем жасауды "підия" деп атайды.

Денсаулығына байланысты уақытша ораза ұстай алмаған адам қарыз күндерін Рамазан айынан кейін өтейді. Ал туберкулез, қатерлі ісік, қант диабеті, асқазан жарасы, тыныс және жүрек демікпесі секілді ауруға шалдығып, сауығудан күдер үзген науқастар және жасы үлкен егде адамдар ауыз бекітуге шамасы келмесе, ораза ұстамайды. "Мұндай адамдар Рамазан айында ұстамаған оразасы үшін қаза болған әр күнге підия береді.

"Підия мөлшері – бір адамның күнделікті (таңғы және кешкі) тойып ішетін асы. Оның биылғы мөлшері 3 мың теңге болып бекітілді. Бұған шамасы келмегендер оразаның әр күніне пітір садақасының құнын береді. Оған да жағдайы болмаса, төлемнен босатылып, Алла Тағаладан кешірім тілейді", – деді ҚМДБ төраға орынбасары Сансызбай Шоқанов.

Підия ретінде бір жарлының бір күндік екі мезгіл тамағын немесе соның құнын ақшалай беруіне болады. Підия кедейлерге, тұрмыстық жағдайы төмен адамдарға, хәлі нашар жандарға үлестіріледі. Оны Рамазан айының басында немесе соңында беруге болады және бірнеше күннің підиясын бір адамға немесе бірнеше адамға бөліп бере алады.


Оқи отырыңыз: Рамазан айындағы підия мөлшері 2023 жылға 3 мың теңге болып бекітілді


Підия берген науқас ауруынан айығып кетсе, дәрменсіз адам күш алса берген підиясы жойылады. Олар бұрынғы оразалардың қазасын өтейді.

"Қайтыс болған адамның орнына ораза ұстауға болмайды. Ұстаған ораза марқұмның тірі кезінде ұстамай кеткен оразасының орнын толтырмайды. Алайда әрбір күні үшін підия беріп тұруға болады. Тірі кезінде себепсіз ұстамаған күндеріне орай есептеп, шыққан соманы марқұмның атынан қаза оразаларының підиясы ретінде бір мұқтаж адамға беруге болады", – делінген ҚМДБ сайтында.

Рамазан айының қазасын өтей алмаған адам ажалы таяп, өлер шағында артындағыларға қалған малынан підия беруді өсиет етеді. Өсиет еткен марқұмның мал-мүлкінің үштен бірінен Рамазан айының күн сайынғы оразасы үшін және қаза болған әр намазы үшін підия беріледі. Підияны өлі адамды жерлегеннен кейін беруге болады, бірақ жерлеуден бұрын берген абзал.

Ораза кезінде бас мүфти әлеуметтік маңызы бар тауарлар мен азық-түлік бағасын 10 пайызға дейін төмендетуді сұраған: 

Біздің Telegram-каналдағы ең көп оқылған жаңалықтар
Серіктестер жаңалықтары