Енді 18 жасқа толған әр Қазақстан азаматы В және С гепатитінің алдын алуға арналған медициналық тексеруден өтуге тиіс, деп хабарлайды 31 арнаның Информбюро ақпараттық бағдарламасы.
Денсаулық сақтау министрлігінің ақпаратынша, гепатит жұқтырғандардың 65 пайызында ауру белгілері байқалмайды екен. Ал дерт дер кезінде анықталмаса адам бауыр обырына немесе циррозға шалдығуы мүмкін.
Тіпті, уақтылы ем қабылдамау мүгедектікке, кейде өлімге де әкеледі дейді мамандар.
"Скринингтік тексерулердің сегіз түрі жүзеге асырылады. Оның ішінде қазіргі таңда маңызы зор онкологиялық аурулардың үш түріне скрининг, қан айналым жүйесіне, қант диабеті және осы вирустық гепатиттерге арналған скринингтік тексерулер жүргізіледі. Тексеруден өткен 1 миллион 800 мыңға жуық адамның 25 мыңға жуығынан қант диабеті бірінші рет анықталып отыр", – деді ҚР ДСМ медициналық көмекті ұйымдастыру департаментінің басқарма басшысы Әсел Қыдыралиева.