Алматы қаласындағы әл-Фараби даңғылында болған резонансты жол-көлік оқиғасына қатысты іс бойынша алдын ала сот отырысы 28 мамыр күні өтеді. Бұл туралы қаза болған 29 жастағы Mercedes жүргізушісінің туыстарының адвокаты Олег Чернов мәлімдеді.
Адвокаттың айтуынша, сотқа дейінгі тергеу аяқталып, іс сот қарауына жолданған. Алдын ала тыңдау 28 мамыр күні сағат 15:00-де Алматы қаласының қылмыстық істер жөніндегі мамандандырылған ауданаралық соты ғимаратында өтеді.
Олег Чернов қылмыстық істі жедел әрі объективті тергегені үшін Алматы қалалық полиция департаменті қызметкерлеріне алғыс білдірді.
Айта кетейік, бұған дейін адвокат айыпталушы тараптың марқұмның туыстарымен татуласуға әрекет жасағанын хабарлаған еді. Алайда қаза болған азаматтың отбасы бұл ұсыныстан бас тартқан.