Қызылорда облысында оқушылар мектепке қайықпен қатынауға мәжбүр болған

Қызылорда облысының Арал ауданында бастауыш сынып оқушылары 40 жыл бұрын салынған балықшылар жатақханасында білім алып жатыр. Ал жоғары сынып оқушылары, тіпті,  білім ордасына өзен арқылы қайықпен қатынауға мәжбүр болған, деп хабарлады 31 арнаның "Информбюро" ақпараттық бағдарламасы. 

"Пантонный" көпірінен өтіп бара жатқанда мұз жарылып кете ме деп қорқамыз. Қайықпен өткен күндеріміз де болды. Мектепке жеткенше шаршап қаламыз", – деді 5-сынып оқушысы Қаһарман Айжарықұлы. 

Қазір 20 оқушы мектепке алты орындық көлікпен қатынап жүр.

---

Оқи отырыңыз: Назарбаев зияткерлік мектебінде оқу грантының сомасы қанша?

---

"Балаларымыз мектепке аман-есен жеткенше уайымдаймыз. ХХІ ғасырға сәйкес білім алса екен дейміз", – дейді Ақшатау ауылының тұрғыны Динара Сабирова. 

Тұрғындардың айтуынша, облысты басқарған төрт әкім де уәде беріп, 5 жыл бұрын мектептің жобалық-сметалық құжаттарын дайындаған. 

"Ауданға да, облысқа да бардық. Алайда, Ақшатау халқына оң көзқарас танытып, нақты жауап берген адамды көрмедік", – деді Ақшатау ауылының тұрғыны Нұртай Әбенов. 

Ал бастауыш мектепте ыстық тамақ беретін асхана мен спорт алаңы да жоқ. Ауыл әкімі жаңа мектептің жоспары өзгергенін айтады. 

---

Назарбаев мектебінің оқушылары басқа ел азаматтығын алса, гранттан айырылады

---

"2023 жылы салынуы керек болатын, халық санына байланысты былтыр жобаны өзгертті. Ауданда апатты жағдайдағы және үш ауысымдағы мектептер бар. Бірінші кезекте солар жөнделеді. Облыс әкімімен арада келісім бар, алда жұмысты бастап кетуге дайындалып жатырмыз", – деді Аманөткел ауылдық округінің әкімі Қайрат Әбдіраманов.