Құтқарушылар Алматы тауларында адасқан туристерді эвакуациялады

Алматы тауларында Төтенше жағдайлар министрлігінің құтқарушылары Башут шыңынан түсу кезінде адасып кеткен төрт туристі эвакуациялады. Бұл туралы ТЖМ баспасөз қызметі хабарлады.

Ведомство мәліметінше, туристер бағдарын жоғалтып, соқпаққа өз бетінше шыға алмаған.

"Барлық қатысушының қара киім киіп алғаны іздеу жұмыстарын қиындатты. Қараңғы уақытта оларды байқау өте қиын болды", – делінген хабарламада.

Көмекке ТЖМ Құтқару қызметінің кезекші тобы шыққан. Құтқарушылар "Шымбұлақ" тау шаңғысы курортына жетіп, "Шымбұлақ" өзеніне қарай бағыт алған туристерді тауып, төмен түсіріп әкелді. Барлық турист қауіпсіз жерге жеткізілді. Олар медициналық көмекке мұқтаж болған жоқ.