Алматыда 14 жастағы жасөспірім бейтаныс адамдармен кездескеннен кейін қымбат iPhone смартфонынан айырылды. Оны ұрлады деген күдікпен кәмелетке толмаған екі жасөспірім ұсталды.
Қалалық Полиция департаментінің мәліметінше, оқиға Бостандық ауданында болған. Тергеу нұсқасына сәйкес, күдіктілер мектеп оқушысын алдап, оның смартфонын иемденіп, оқиға орнынан қашып кеткен.
"Жедел-іздестіру шаралары барысында полицейлер күдіктілердің жеке басын қысқа уақыт ішінде анықтап, оларды ұстады. Белгілі болғандай, екеуі де кәмелетке толмаған. Тергеу барысында қылмыс жасалғаннан кейін күдіктілердің жасырынуына кәмелетке толған ер адамның көмектескені анықталды. Ол да полиция қызметкерлерінің қолына түсті. Сондай-ақ полицейлер ұрланған iPhone табылған әйелдің де жеке басын анықтады. Смартфон тәркіленіп, қылмыстық іс бойынша заттай дәлел ретінде тіркелді", – делінген хабарламада.
Қазіргі уақытта аталған дерек бойынша сотқа дейінгі тергеу жалғасып жатыр. Полиция оқиғаның барлық мән-жайын анықтап жатыр.