Алматыда қытайлық Yutong Bus компаниясы QazTehna компаниясымен бірлесіп жаңа буындағы Yutong ZK6126BEVG электр автобусын таныстырып, Nomad Bus демонстрациялық алаңының ресми ашылу рәсімін өткізді. Іс-шараға автобус парктерінің басшылары, салалық серіктестер, мемлекеттік органдардың өкілдері және бұқаралық ақпарат құралдарының өкілдері қатысты.
Шараның басты мақсаты – Қазақстандағы экологиялық таза қоғамдық көлікті дамытуға арналған заманауи технологияларды таныстыру және электр автобустарын пайдаланудың тиімділігін көрсету болды.
Шара барысында қатысушыларға компанияның қоғамдық көлікті электрлендіру саласындағы шешімдері ұсынылды. Бағдарлама аясында жаңа электр автобусының техникалық мүмкіндіктері таныстырылып, автобус кілтін салтанатты түрде табыстау рәсімі өтті. Сондай-ақ Nomad Bus демонстрациялық алаңының ашылуына орай дәстүрлі лента қию рәсімі ұйымдастырылды.
Компанияның Қазақстандағы директоры Владимир Юань Қазақстанда экологиялық таза қоғамдық көлікті дамыту бағытындағы жоспарларымен бөлісті. Оның айтуынша, компания жергілікті серіктестермен ынтымақтастықты кеңейтіп, өңірдегі электр көлігі инфрақұрылымын дамытуға үлес қосуды көздейді.
Nomad Bus компаниясының өкілі Ербол Әбілов электр автобустарын енгізу қоғамдық көліктің сапасын арттырумен қатар қоршаған ортаға түсетін жүктемені азайтатынын атап өтті. Ол қытайлық компаниямен әріптестік Қазақстандағы экологиялық көлік жүйесін дамытуға серпін беретінін жеткізді.
Жаңа электр автобусының ұзындығы – 12,17 метр, ені – 2,55 метр, биіктігі – 3,3 метр. Автобус 30 жолаушыға арналған отырғыштармен (27+2+1) жабдықталған. Батареясының сыйымдылығы 399,92 кВт·сағ, ал кеңейтілген нұсқасында 434,93 кВт·сағатқа дейін жетеді. Электр қозғалтқышының номиналды қуаты 215 кВт, ең жоғары қуаты 350 кВт, ал ең жоғары айналу моменті 3200 Н·м құрайды. Автобустың ең жоғары жылдамдығы 70 км/сағ, ал 16 пайызға дейінгі еңістерді еңсере алады.
Мамандардың айтуынша, жоғары сыйымдылықтағы аккумулятор автобусты күні бойы тұрақты пайдалануға мүмкіндік береді. Қуатты электр жетегі, жоғары маневрлік қабілеті, төмен шу деңгейі және атмосфераға зиянды шығарындылардың болмауы оны заманауи қалалық қоғамдық көлік үшін тиімді шешімге айналдырады.
Қазақстанда қоғамдық көлікпен жүру қашан қауіпсіз болады? Yutong тәжірибесі