Биыл 13-14 шілдеде Алматыда алғаш рет баскетболдан 3х3 санатындағы World Tour турнирі өтеді. Оған алдын ала іріктеуден өткен 12 халықаралық команда қатысады.
Ұйымдастырушының World Tour Masters Almaty-2024 турниріне өз таңдауы бойынша бір команданы (Wild Card деп аталатын) енгізу құқығынан басқа, Қазақстан Республикасы баскетбол федерациясы 2 команданы қоса алады. Ол квоталар 15-16 маусымда Атырауда FIBA демеушілігімен өтетін "Atyrau Quest" турнирінің жеңімпаздарына беріледі. Қазақстандық командалар бұл турнирге 3х3 баскетболдан Қазақстан чемпионатының кезеңдері арқылы жолдама алады.
2023 жылы 3x3 Almaty Quest баскетбол турниріне қатысқан FIBA Атқарушы директоры Алекс Санчес мырза іс-шараның ұйымдастырылу сапасы туралы жоғары баға берді және Алматының жоғары деңгейдегі турнирлерді өткізуге дайын екеніне сенімді болды. Сондай-ақ ол Қазақстан баскетбол федерациясының FIBA-мен бірлесіп, елімізде 3х3 баскетболын тұжырымдамалық дамыту бағытында көптеген жұмыстар атқарып жатқанын атап өтті. Нәтижесінде FIBA биыл Қазақстанға әлемдік тур деңгейіндегі турнир өткізуді сеніп тапсырды.
Еске салайық, World Tour деңгейіндегі турнир – FIBA-ның басты жарысы. "Алматы туры" маусымның соңындағы гранд-финал жолындағы маңызды және жоғары деңгейдегі турнирлердің бірі болып саналады.
"FIBA барлық дайындық процесін мұқият қадағалайды және турнирді өткізуге тікелей қатысады. Біз шамамен 25 адамнан тұратын FIBA делегациясының келуін күтеміз. Әрине, біз FIBA-ның бірінші көшбасшылары Алматыға келетініне сенім білдіреміз. Ұйымдастырушылар Wild Card ойынын арнайы ашық турнирде беруді ұйғарды. Ол екі іріктеу форматында Астана мен Алматыда, сондай-ақ оңтүстік астанамызда өтетін финалдық кезеңінде анықтайды. Бұл турнир 3x3 Road to Wild Card WT Almaty-2024 деп аталады және жақын арада жарияланады. FIBA талаптары мен турнир ережелеріне сәйкес келетін кез келген команда қатыса алады", – дейді World Tour Masters Almaty-2024 ұйымдастырушылары.
Айта кету керек, 3х3 баскетбол бүгінде ең серпінді дамып келе жатқан және әсерлі спорт түрлерінің бірі болып табылады және ол Жазғы Олимпиада ойындарының бағдарламасына да енгізілген. Дүниежүзілік турды Алматыда өткізу отандық 3х3 баскетболының дамуына қуатты серпін беріп, қаланың және еліміздің спорт тарихында қалады.
World Tour Masters Almaty-2024 ұйымдастырушылары – Алматы қаласының әкімдігі, 3x3 Pilot Sports жобасының промоутері. Турнир Қазақстан баскетбол федерациясының қолдауымен өтеді.
