1 қыркүйек күні президенттік кадрлық резервке қабылдаудың екінші іріктеу кезеңі басталады. Биыл үміткерлер мемлекеттік тілді білу деңгейі туралы құжат тапсыруға міндеттеледі. Бұл туралы ҚР Президенті жанындағы Мемлекеттік басқару академиясының ректоры Ерлан Әбіл мәлімдеді.
"Биыл президенттік жастар кадры резервіне іріктеудің жаңашылдығының бірі – үміткерлер мемлекеттік тілді білу деңгейін растайтын құжатты тапсыруы қажет. Яғни үміткерлерде qaztest немесе qazaqresmitest сертификаттарының болуы шарт. Qaztest офлайн форматта, qazaqresmitest үміткерлерге ыңғайлы уақытта онлайн өтеді. Ол үшін веб-камера, микрофон және интернеті бар компьютер болуы керек. Үміткерлер мемлекеттік басқару академиясында qazaqresmitest тапсыруға бағытталған арнайы дайындық курсынан өте алады", – деді Ерлан Қуанышұлы.
Десе де, мемлекеттік тілді білу – үміткерлерге қойылатын басты шарт емес. Қазақ тілін жетік білмейтін азаматтар да жастар кадры резервін толықтыра алады.
"2019 жылы қазақ тілі тестін қойған жоқпыз. Конституция бойынша, тіл білмеуіне қатысты азаматты төмендете алмаймыз. Бірақ осы жылы қазақ тілін қосып жатырмыз. Басқа ұлт өкілдері қазақ тілін білмей жатса, сол үшін өткізбей қоюға құқығымыз жоқ. Оны заңгерлер жақсы біледі. Біз, ең бастысы, өзі үшін емес, мемлекетке қандай да бір пайда келтірсем деген ниетпен келген адамдарды қабылдауға тырысамыз", – деп түсіндірді ҚР Мемлекеттік қызмет істері агенттігінің төрайымы Анар Жайылғанова.
Еске салсақ, үкіметаралық келісім шеңберінде қазақстандықтардың тегін білім алатын елдер саны онға жеткені туралы хабарлаған едік. Тізімге Словакия, Әзірбайжан және Вьетнам елдері қосылды.
