Ресейдің Алматыдағы Бас консулдығы рэпер Navai (Наваи Бакиров) Қазақстанда ұсталуына байланысты елдің Сыртқы істер министрлігіне нота жолдап, жағдайдың мән-жайын түсіндіруді сұрады. Бұл туралы РИА Новости агенттігі дипломатиялық өкілдіктің баспасөз қызметіне сілтеме жасап хабарлады.
Музыкант 13 қазанда Қырғызстаннан Қазақстанға кіріп келе жатқанда "Қордай" өткізу бекетінде ұсталған. Жамбыл облысының полиция департаменті рэпердің көлігінен есірткі табылғанын мәлімдеді. Оған есірткі контрабандасына оқталды деген күдікпен қылмыстық іс қозғалып, уақытша ұстау изоляторына қамалды. Астанада 14 қазанға жоспарланған концерті де тоқтатылды.
Ресейдің бас консулдығы нота жолдау дипломатиялық өкілдіктің жергілікті билікпен ресми байланыс орнату тәсілі екенін түсіндірді.
"Біз жағдайды нақтылау, Ресей азаматының қазір қайда екенін, қандай жағдайда ұсталып отырғанын білу және қажет болған жағдайда онымен консулдық кездесу ұйымдастыруды сұрау үшін нота жолдадық", – деді агенттікке сұхбат берген дипломатиялық өкілдік қызметкері.
Бас консулдықтың мәліметінше, Ресей Наваи Бакировтың ұсталғаны туралы ақпаратты бұқаралық ақпарат құралдарынан білген. Жергілікті билік дипломатиялық өкілдікке ресми хабарлама жібермеген. Сондай-ақ Жамбыл облысының полиция департаменті бұл оқиға туралы Қазақстанның Сыртқы істер министрлігін де хабардар етпеген.
Осыған байланысты Ресейдің бас консулдығы рэпердің адвокаты немесе басқа тұлғалар өтініш білдіруін күтпей, ресми сұрау жолдаған.
Музыканттың қорғаушылары оны екі айға қамау туралы сот қаулысына апелляциялық шағым дайындауға кіріскен.
Айта кетейік, Наваи Бакиров 1995 жылғы 2 сәуірде Самара қаласында дүниеге келген. Ол HammAli орындаушысымен бірге құрған HammAli & Navai дуэті арқылы танымал болды. Олардың "Птичка", "Девочка-война" және "Пустите меня на танцпол" әндері көпшілікке кеңінен танылған.
Қазақстанда ресейлік рэпер Navai қамауға алынды