Алматыдағы жаппай тәртіпсіздікке қатысқан екі экстремистік топ құрықталды

Ұлттық қауіпсіздік комитеті жаппай тәртіпсіздік пен террористік актіге қатысқандарды ұстау және жасалынған қылмыстардың себептерін анықтау бойынша кешенді іс-шара жүргізіп жатыр, деп хабарлады ҰҚК баспасөз қызметі.

Соның нәтижесінде 2022 жылдың 4 мен 8 қаңтар аралығында Алматы қаласындағы жаппай тәртіпсіздікке қатысқан 2 экстремистік топ құрықталған.

"9 қаңтарда экстремистік әрекетке алдап-арбау, экстремистік ұйымға басшылық ету және оған қатысу, сондай-ақ жаппай құқыққа қайшы акцияларды жүргізу күдігімен бір ұяшықтың 4 мүшесі ұсталды", деп жазылған хабарламада.

Күдіктілердің тұрғылықты мекенін тексеру барысында атылатын қару, дыбыс-жарық гранаталар, оқ-дәрілер және діни әдебиеттер заттай айғақ ретінде тәркіленген.

ҰҚК дерегінше, ұйым жетекшісі – халықаралық террористік ұйыммен байланысы бар, жаппай тәртіпсіздікке белсенді түрде атсалысқан шетел азаматы. Тергеу тұжырымы бойынша, оның Қазақстанға жаппай құқыққа қайшы акцияларды дайындап, сондай-ақ билік органдары мен қарулы құрылымдарға шабуыл жасау үшін келгені анықталды. Оған осы мақсатта көмек берушілерді іздестіру ұйымдастырылды.

Тергеу қызығушылығына сәйкес кейбір ақпараттарды жариялау әзірге мүмкін емес. Жедел және тергеу шаралары жалғасын табуда.

"Сонымен қатар, кейбір БАҚ-та және әлеуметтік желілерде ҚР ҰҚК Алматы қаласы бойынша департаментінен қару-жарақтар, оқ-дәрілер, басқа да мүліктер ұрланғаны жайында таралған ақпараттар жалған", деп хабарлайды ҰҚК.

Қазір террористік қауіптің "қызыл" деңгейінің талаптарына сәйкес, департамент күшейтілген тәртіпте қызмет атқарып жатыр.