Уганда билігі Эбола безгегінің таралуының алдын алу мақсатында 100-ден астам адамды карантинге жапты. Бұл туралы Report агенттігі хабарлады.
Мәлімет бойынша, оқшауланған азаматтар тұрақты медициналық бақылауға алынған. Дәрігерлер олардың денсаулығын бақылап, инфекция белгілерінің бар-жоғын үнемі тексеріп отыр.
Уганда билігі жағдай толық бақылауда екенін мәлімдеді. Ел үкіметі бұған дейінгі індеттермен күрес тәжірибесі қазіргі қауіпке жедел әрі тиімді әрекет етуге мүмкіндік беретінін атап өтті. Қазір індеттің негізгі ошағы ретінде Конго Демократиялық Республикасының шығысындағы Угандамен шекаралас Итури провинциясы аталып отыр.
Бұған дейін Дүниежүзілік денсаулық сақтау ұйымы Конго Демократиялық Республикасы мен Угандадағы Эбола індетінің өршуіне байланысты халықаралық деңгейдегі төтенше жағдай жариялаған болатын.
Жергілікті денсаулық сақтау қызметтерінің деректеріне сәйкес, Конгода 500-ден астам ықтимал инфекция жағдайы тіркеліп, 130-дан астам адам қайтыс болған. Ал Угандада әзірге Эболаның бір расталған жағдайы мен бір өлім фактісі анықталды.