Алматы қаласының Медеу ауданындағы Самал-3 шағынауданы, 21-үйдің қасбетіне КСРО Халық артисі, қазақтың аты аңызға айналған әншісі Роза Бағланованың бейнесі салынған мурал пайда болды, деп хабарлайды әкімдіктің баспасөз қызметі.
Әкімдіктің мәліметінше, жоба тұрғындардың әкімдікке жасаған өтініші негізінде жүзеге асырылған. Айта кетерлігі, Роза Бағланова кезінде дәл осы үйде тұрған. Енді ғимарат қасбеті өнер иесіне деген ерекше құрметтің белгісіне айналып отыр.
Муралды дайындау және жүзеге асыру жұмыстарына әншінің келіні Марал Бағланова да қатысқан. Ол бастамаға қолдау білдіріп, жоба авторлары мен ұйымдастырушыларына алғысын жеткізді.
Осылайша, қазақ өнерінің жарық жұлдызы Роза Бағланованың бейнесі енді халық жадында ғана емес, Алматының сәулеттік келбетінде де мәңгілік сақталады.