Қазақстанда құрылыс көлемі 14,8% өсті: Ұлытау облысы көш бастап тұр

Қазақстанда 2026 жылғы қаңтар–наурыз айларында құрылыс жұмыстарының көлемі 14,8%-ға өсіп, 1,23 трлн теңгеге жетті. Бұл туралы Ұлттық статистика бюросы хабарлады.

Ведомство мәліметінше, өсім негізінен құрылыстарды салу және жөндеу жұмыстары көлемінің 37,5%-ға артуымен байланысты.

Құрылыс жұмыстарының құрылымында ең үлкен үлесті автомобиль және теміржол жолдарын, сондай-ақ метрополитенді салу (25,5%) алады. Бұдан кейін тұрғын емес ғимараттар (22%) және тұрғын үйлер (11,6%) келеді.

Өңірлік бөліністе құрылыс көлемінің өсуі елдің 16 өңірінде тіркелген. Ең жоғары өсім Ұлытау облысында (2 есе), Жамбыл облысында (52,7%), Павлодар облысында (26,6%), Маңғыстау облысында (23,1%), Қызылорда облысында (22%), Батыс Қазақстан және Түркістан облыстарында (17,4%), Шығыс Қазақстан облысында (15,9%) байқалды. Сондай-ақ, Шымкент қаласында өсім 49,2%, ал Алматы қаласында 22,7% болды.

Сонымен қатар, есепті кезеңде пайдалануға берілген жаңа нысандардың жалпы алаңы 4,8 млн шаршы метрді құрады. Оның ішінде тұрғын үй көлемі 3,8%-ға өсіп, 3,87 млн шаршы метрге жетті.