Арбалар мен протездер жалға беріледі: Қазақстанда әлеуметтік қорғау жүйесі жаңа форматқа көшеді

Үкімет отырысында инклюзивті саясатты іске асыру мәселелері талқыланып, Қазақстан Республикасының Еңбек және халықты әлеуметтік қорғау министрлігі әлеуметтік қорғау саласын жетілдіру бағыттарын ұсынды. Бұл туралы Еңбек және халықты әлеуметтік қорғау министрі Асқарбек Ертаев мәлімдеді.

Министрдің айтуынша, бірінші жартыжылдықтың соңына дейін ұйымдардың квоталарды орындауын бақылау үшін цифрлық есепке алу жүйесі әзірленеді. Сонымен қатар, мүгедектігі бар азаматтарды жұмысқа орналастыруға арналған цифрлық қызмет іске қосылады. Бұл сервис жұмысқа орналасқанға дейін азаматтарды проактивті түрде сүйемелдейді.

Биыл шамамен 17 мың мүгедектігі бар адамды квота арқылы жұмыспен қамту жоспарланып отыр. Бұл көрсеткіш 2025 жылмен салыстырғанда екі есе жоғары.

Министрлік әлеуметтік қорғау жүйесін трансформациялау жұмыстарын жалғастырып жатыр. Негізгі мақсат – бөлшектенген қызмет көрсетуден біртұтас модельге көшу. Яғни, әр азаматқа көмек оның нақты қажеттілігіне қарай жеке көрсетіледі.

"Маңызды бағыттардың бірі – оңалтудың техникалық құралдарын беру тетігін жаңарту. Қазіргі қайтарымсыз жүйенің орнына құралдарды жалға беру және кейін қайтару механизмі енгізіледі. Бұл жоба маусым айынан бастап Ақтөбе облысы, Қарағанды облысы және Павлодар облысында пилоттық режимде іске қосылады. Жаңа жүйе бойынша қайтарылған құралдар техникалық сараптамадан өтіп, олардың жағдайына қарай жөндеу, қайта пайдалану немесе жою туралы шешім қабылданады. Ал пайдалануға жарамсыз құралдар ауыстырылып, өтініш берушілерге жаңасы беріледі. Сондай-ақ, мүгедектікті сырттай, проактивті форматта белгілеу бағытында оң өзгерістер бар. Егер 2022 жылы мұндай қызметтердің үлесі 22% болса, 2026 жылдың бірінші тоқсанында бұл көрсеткіш 46%-ға жеткен", – деді министр.

Бұдан бөлек, мүгедектігі бар балаларды оңалту бағытында Қазақстан халқына қорымен бірлесіп пилоттық жоба жүзеге асырылып жатыр. Жоба Абай облысы, Павлодар облысы, Қызылорда облысы және Шымкент қаласында қолға алынған.

Министрдің айтуынша, барлық бастамалар әлеуметтік қызметтердің тиімділігін арттырып, азаматтарға көрсетілетін көмекті барынша қолжетімді етуге бағытталған.