Каспий теңізіндегі қайғылы оқиғадан аман қалған әскери қызметші Бекет Мырзағалиев жағалауға өз күшімен жүзіп жеткен. Қазір 19 жастағы сарбаз өзін жақсы сезінеді және өздігінен жүріп-тұра алады. Бұл туралы "Ақ Жайық" хабарлады.
Сарбаздың анасы Қарлығаш Мырзағалиеваның айтуынша, ұлы 2025 жылғы 3 қазанда мерзімді әскери қызметке шақырылып, Ақтаудағы №29011 әскери бөлімінде қызмет атқарған.
Бекет 24 қыркүйекте Каспий теңізіндегі оқу-жаттығу кезінде теңізге кеткен әскери қызметшілердің арасынан аман қалған үш сарбаздың бірі.
"Таңертең Ақтауға келіп, баламызды көрдік. Аман-есен, өздігінен жүріп жүр. Ұлым жағалауға өз күшімен жеткен. Қалған жайттар тексеру аяқталғаннан кейін белгілі болады деп ойлаймын. Балаларымыз әлі жас. Олардың басынан өткені өмір бойы есінде қалатыны анық", – деді Қарлығаш Мырзағалиева.
Ол қаза болған әскери қызметшілердің отбасыларына көңіл айтты.
24 қыркүйекте Қазақстан Қарулы күштерінің Әскери-теңіз күштері оқу-жаттығуы кезінде қолайсыз ауа райына байланысты әскери қызметшілер Каспий теңізіне ағып кеткен. Ресми мәлімет бойынша, 17 әскери қызметші теңізге кеткен. Олардың 14-і қаза тауып, үшеуі аман қалды.
Бұған дейін қаза болған сарбаздардың туыстары олардың үйге бір аптадан кейін оралуы тиіс болғанын айтқан. 23 және 24 қыркүйекте Маңғыстау облысында желдің күшейетіні туралы ескерту жарияланған.
Әскери қызметшілердің қаза болуына байланысты екі қылмыстық іс қозғалды. Тергеу барысында 30-дан астам әскери қызметші жауап беріп, қызметіне салғырт қарады деген күдікке ілінген лауазымды тұлғалар анықталған.
25 қыркүйек Қазақстанда қаза болған әскери қызметшілерді еске алуға байланысты жалпыұлттық аза тұту күні болып жарияланды.
Оқи отырыңыз:
Каспийде қаза болған сарбаздардың жақындарына ұшақ билеті тегін беріледі
Каспийде қаза болған үш сарбаздың денесі Оралға жеткізілді. Жерлеу рәсімі ертең өтеді