Ұлттық қор – балаларға: Шоттағы қаражат 10 жыл ішінде пайдаланылмаса, зейнетақы қорына аударылады

Балалар 18 жасқа толған соң 10 жыл ішінде "Ұлттық қор – балаларға" бағдарламасы аясында аударылған қаражатты пайдаланбаса, ол бірыңғай жинақтаушы зейнетақы қорына аударылады. Бұл туралы "1001 түн" бағдарламасында айтылды.

Қаржы Қазақстан Республикасының азаматы атанған әр балаға 18 жасқа толғанша аударылады. Бала ол қаражатты кәмелет жасқа толған соң екі мақсатта: тұрғын үй жағдайын жақсарту және білім алу үшін пайдалана алады. 

"Бір үйдің бірнеше баласы болса, құқықтық мүмкіндіктер беріледі. Егер мүгедектігі бар бала болса, білім алуға қабілеттілігі қиындық туындаса, заң шығарушы орган басқа мүмкіндіктерді де қарастырады", – деді ұлттық қор және қаржы секторы мәселелері бойынша өзара іс-қимыл департаментінің директоры Айбол Арғынғазинов.

"Шот долларлық есепте ашылады. Тіркеуге кірмей қалған ауылдық жерде балалар да бар. Бірақ, бұл Қазақстан азаматтарға ғана беріледі. Белгілі бір жасқа келгенше көшіп келген өзге ел азаматтарына берілмейді", – деді парламент мәжілісінің заңнама және сот-құқықтық реформа комитетінің мүшесі Үнзила Шапақ.

Қаражатты алып отыру үшін ата-анаға баласы үшін есепшот ашудың қажеті жоқ. Себебі базада тіркелген әр балаға шот автоматты түрде ашылады.

"Бірақ мектепті аяқтаған соң мемлекет тарапынан грантқа ие болып, ақшаны алмаса, ақша сақталып тұрады. Егер 10 жыл ішінде алушы тараптан сұраныс болмаса, бірыңғай жинақтаушы зейнетақы қорына аударылады, Осы заң жобасымен қатар 6 кодекске, 10 заң жобасына өзгерістер енгізіледі", – деді Айбол Арғынғазинов.

Жыл сайын шотқа аударылатын қаражат сомасы өзгеріп отыруы мүмкін. Себебі ол Ұлттық қордың 18 жылдық кірістілік мәніне байланысты аударылады.