Қуантыров Ұлттық қор қаржысы балаларға неге доллармен аударылатынын түсіндірді

Ұлттық экономика министрі Әлібек Қуантыров қазіргі таңда Ұлттық қордан балаларға аударылатын ақша көлемі есептеліп жатқанын мәлімдеді. Жоба бойынша, ақша 18-ге толмаған балаларға жылына бір рет аударылады.  

"Жүйе 2024 жылы қолданысқа енгізілетін болса, бала оған жасына байланысты бірнеше жыл, мәсалы, бір не бес жыл қатыса алуы мүмкін. Сәйкесінше, оның шотында жиналатын қаражат та азырақ болады. Ал "бала 18 жасқа толғанша шотындағы ақша құнсызданып кетпей ме?" дегенге келсек, қаражат құнсызданбайды, себебі ол доллармен аударылады", – деді министр.

Әлібек Қуантыров Ұлттық қордан балалардың шотына қаржы неліктен доллармен аударылатынын түсіндірді.

"Себебі, Ұлттық қордағы қаражат 100% доллармен сақталады. Өйткені, қордың бүкіл активтері шетелде, яғни шетелге инвестицияланған. Ол да бізге ыңғайлы. Сол үшін солай шоттарға жберілетін болады", – деп түсіндірді министр.

Министр қаражаттың жыл сайынғы негізде аударылатынын айтты. Әр жыл сайын өткен жылдың инвестициялық табысы есептеліп, соның елу пайызы шоттарға бөлініп, жіберіледі.

Әлібек Қуантыровтың айтуынша, соңғы он жылда Ұлттық қордың инвестициялық табысы орташа есеппен 2,74 пайызды құраған.

Оқи отырыңыз:

• "Ұлттық қор – балаларға" жаңа бағдарламасы іске қосылады
• Ұлттық қордың қаржысын тиімсіз жұмсау тоқтатылады