Алматы әкімі Дархан Сатыбалды жұмыс сапары барысында Үлкен Алматы көлі маңындағы туристік инфрақұрылымды дамытуға арналған жобалармен танысты, деп хабарлайды әкімдіктің баспасөз қызметі.
Әкімге "Алматы – Космостанция" автожолын және "Алма-Арасан" шипажайына апаратын кіреберіс жолды күрделі жөндеу жобасы таныстырылды. Жоба аясында 26,5 шақырым жол толық жаңартылып, автотұрақ салынады.
"Сонымен қатар Үлкен Алматы көліне апаратын аспалы жол станциясының тұжырымдамасы ұсынылды. Жоба экологиялық таза көлік түрін дамытуға және туристердің көлге қолжетімділігін арттыруға бағытталған. Жоба аясында ұзындығы 5,3 шақырым болатын заманауи туристік соқпақ салынады. Маршрут бойында бағыттаушы белгілер, ақпараттық стендтер, демалыс орындары, шолу алаңдары, фотоаймақтар, баспалдақтар мен өткелдер орнатылады", – делінген хабарламада.
Жұмыс сапарының қорытындысында Дархан Сатыбалды барлық жобаны сапалы әрі белгіленген мерзімде аяқтауды, сондай-ақ экологиялық талаптарды қатаң сақтауды тапсырды.