Мұғалімдерге арналған курс құны қалай есептеледі? Оқу министрлігінің жаңа жобасы

Ашық НҚА порталында Оқу-ағарту министрлігінің педагогтердің біліктілігін арттыру курстарының құнын айқындау әдістемесін бекіту туралы бұйрығының жобасы жарияланды.

Курс қызметінің құнын есептегенде оны іске асыруға байланысты барлық шығындар ескеріледі. Жобада курстар қызметінің құны арнайы формулалармен есептелген. 

Сағатына бір тыңдаушыға шаққандағы еңбекақы төлеуге жұмсалатын шығындар нормасы персоналдың жылдық еңбекақы төлеу қорының жұмыс уақытының жылдық теңгеріміне қатынасы ретінде анықталады. Оған оқу процесіне қызмет көрсетуге және сүйемелдеуге қажет тауарлар, жұмыстар мен көрсетілетін қызметтерді сатып алуға жұмсалатын шығындар нормасы қосылады. Сонда педагогтердің біліктілігін арттыру курстары қызметінің құны шығады.

Сатып алуға жұмсалатын шығындар:

• жұмыс берушінің бір жыл ішіндегі жарналары (салықтар, алымдар және аударымдар) – 3,23 АЕК;
• тауарларды сатып алуға жұмсалатын шығындар (шаруашылық және кеңсе тауарлары, сертификаттар) –13,86 АЕК;
• жеткізушілердің жұмыстары мен қызметтерін сатып алуға жұмсалатын шығындар – 52,67 АЕК;
• ғимараттардың, құрылыстардың және басқа да негізгі құралдардың амортизациясы – 9,3 АЕК;
• іссапарға жұмсалатын шығындар – 16,95 АЕК (күндізгі бөлімде өткізілетін курстар үшін).

Ал еңбекақы төлеуге жұмсалатын шығындар нормасына күнтізбелік жылдағы жұмыс уақытының теңгерімі, жыл сайынғы ақылы еңбек демалысына сауықтыру жәрдемақыларын төлеуге жұмсалатын шығындардың жылдық көлемі, педагогтің лауазымдық айлықақысы, коэффициенттер, медициналық сақтандыру аударымдары, міндетті зейнетақы жарналары, білім алушылар саны әсер етеді.