"Санитарлық-эпидемиологиялық сараптама және мониторинг ғылыми-практикалық орталығы" филиалы директоры орынбасарының міндетін атқарушы Манар Смағұл вакцинаның бірінші компонентін салдырған соң өзінің жүкті екенін білген әйелдерге еш уайымдамауға кеңес берді.
"Әйел өзінің жүктілігі туралы вакцина салдырған соң білген болса, еш уайымдамасын, ешқандай әрекет жасаудың қажеті жоқ. Бүгін қолымызда бар деректер осылай кеңес береді. Себебі, дүниежүзінде керісінше осы жүкті әйелдерге де коронавирусқа қарсы вакцина салу мәселесі талқыланып жатыр", – деді маман.
Денсаулық сақтау магистрінің айтуынша, вакцина жүкті әйелдерге бірден әсер етпейді. Сондай-ақ, өзінің жүкті екенін біле тұра екпе алғысы келетін болашақ аналар бар.
"Дүниежүзілік денсаулық сақтау ұйымының деректері бойынша, нақты жұмыстар жүргізіліп жатыр. Яғни нақты ғылыми деректер пайда болған кезде біз де бұл жүйені қарастыруымыз мүмкін", – деді Манар Смағұл.
Еске салсақ, Манар Смағұл екпені денсаулығы көтере алмайтын адамдарға берілетін екі түрлі анықтаманың қанша мерзімге жарайтынын түсіндірген еді.
