Алматының Әуезов ауданында қаланың бірыңғай сәулеттік-көркемдік келбетін қалыптастыру жұмыстары жалғасуда. Осы бағыттағы жұмыстар аясында 1 500-ге жуық заңсыз орнатылған маңдайша мен жарнама құрылымы алынып тасталды, деп хабарлайды әкімдіктің баспасөз қызметі.
Аудан әкімдігінің мәліметінше, дизайн-код талаптарын іске асыру аясында Сәулет және қала құрылысы басқармасы мен Полиция департаменті бірлесіп заңсыз орналастырылған 1 500-ге жуық маңдайша мен жарнама құрылымын алып тастаған.
"Қазір Алтынсарин және Абай даңғылдары, сондай-ақ Саин, Жандосов, Шаляпин және Төле би көшелерінің бойындағы 15 учаскеде ғимараттардың қасбеттері мен маңдайшаларын қаланың дизайн-коды талаптарына сәйкестендіру жұмыстары кезең-кезеңімен жүргізіліп жатыр", – делінген хабарламада.
Сонымен қатар аудан әкімдігі кәсіпкерлік нысандарының иелеріне қасбеттер мен маңдайшаларды талапқа сәйкестендіру қажеттігі туралы 200-ден астам хабарлама табыстаған.