Қазақстанда коронавирус жұқтырудың алғашқы деректері 13 наурызда тіркелді. 75 күннің оқиғаларын осы жерден оқуға болады.

27 мамыр. Коронавирус жұқтырғандар саны – 9 576

  • Алматы – 2 378;
  • Нұр-Сұлтан – 1 820;
  • Атырау облысы – 959;
  • Қарағанды облысы – 754;
  • Шымкент – 730;
  • Батыс Қазақстан облысы – 493;
  • Жамбыл облысы – 362;
  • Түркістан облысы – 354;
  • Қызылорда облысы – 324;
  • Алматы облысы – 319;
  • Ақтөбе облысы – 304;
  • Павлодар облысы – 192;
  • Маңғыстау облысы – 177;
  • Ақмола облысы – 149;
  • Қостанай облысы – 136;
  • Шығыс Қазақстан облысы – 74;
  • Солтүстік Қазақстан облысы – 51.

Жазылғандардың жалпы саны – 4 768.

Көз жұмғандар – 37.

Мемлекет басшысы дәрігерлердің жалақысын арттыруды тапсырды

Мемлекет басшысы үкіметке биылдан бастап дәрігерлердің жалақысын біртіндеп арттыруды тапсырды. Енді дәрігерлердің еңбекақысы экономикадағы орташа жалақыдан 2,5 есе жоғары болуға тиіс. Үкімет бұл көрсеткіштерге 2023 жылға қарай қол жеткізуі керек.

"Коронавирус пандемиясы бүкіл әлемде денсаулық сақтау жүйесі үшін үлкен сынақ болды. Бұл індет елімізде кәсіби дәрігерлердің жетіспеушілігі мәселесінің бар екенін көрсетті. Бұған себеп — төменгі жалақы, осы мамандықтың беделінің төмендігі және медицина қызметкерлерінің құқықтарының қорғалмауы", – деді президент Қасым-Жомарт Тоқаев ҰҚСК отырысында.

Оқи отырыңыз: "Болашақ педагогтер стипендиясы 42 мың теңгеге дейін өседі". ҰҚСК үшінші отырысында айтылған маңызды мәселелер

Дәрігерлерді қылмыстық жауапкершілікке тарту мәселесі қайта қаралуы керек

Мемлекет басшысы соңғы кезде қоғамда қазақстандық медицина туралы жағымсыз пікірлер көп айтылып жүргенін сөз етті. Оның айтуынша, медицина қызметкерлері өз міндетін орындау барысында жасаған қателігі үшін тартылатын қылмыстық жауапкершіліктің қаншалықты орынды екеніне сыни көзбен қарап көрген жөн.

"Соңғы кездері дәрігерлердің заңсыз, әділетсіз қудаланған оқиғалары жиі қайталанып жүр. Менің ойымша, осы мәселені қайта қарастырғанымыз жөн. Медицина қызметкерлерін қылмыстық жауапкершілікке тарту қаншалықты орынды? Тергеу барысында дәрігер немқұрайлылығының деңгейін анықтап-білу өте қиын", – деді Тоқаев.

Оның сөзінше, қазірдің өзінде қаншама дәрігерлер қылмыстық жауапкершілікке тартылған. Клиникалық зерттеулер жүргізу тәртібінің бұзылғаны үшін қылмыстық жазаға тарту мәселесін қайта қарастыру қажет. Өйткені жазаға тартылу қаупі медицина қызметкерлерінің ғылымнан бас тартуына себеп болуы мүмкін.

"Әрине, жоғарыда айтқандарым дәрігерлерді адам өмірі мен денсаулығы алдындағы жауапкершіліктен босатпайды. Алайда бұл жауапкершілік қылмыстық емес, әлемнің дамыған елдеріндегідей әкімшілік және азаматтық-құқықтық жауапкершілік болуы тиіс", – деді президент.

Тоқаев коронавирустың қайталануына дайын болуға шақырды

Президент Қасым-Жомарт Тоқаев Қазақстанның пандемия таралуының шарықтау шегінен өткенін, алайда эпидемиямен күрес әлі аяқталмағанын айтты.
"Мен бұған дейін коронавирустың қайталануына дайын болуымыз керектігін айтқан едім. Еліміздің және көрші мемлекеттердің аумағында табиғи ошақтардың және басқа да қауіпті инфекциялардың болуымен жағдай шиеленісе түсуде. Соңғы кезде қабылданған бірқатар шаралар инфекциялық бақылау бойынша сантитарлы-эпидемиялық жағдайдың босаңсуына әкелді", – деді президент.

Оқи отырыңыз: "Жабылу алдындамыз". Карантин жеке меншік балабақшалар жұмысына қалай әсер етті?

Бас мемлекеттік санитарлық дәрігердің өкілеттігі артады

Мемлекет басшысы әлем елдері үшін қауіпсіздіктің маңызды бөлігі – биологиялық қауіпсіздік мәселесі екенін айтты. Осыған орай қазірдің өзінде жаңа комитетті құру жұмысы басталды. Бас мемлекеттік санитарлық дәрігердің мәртебесі мен өкілеттігі арттырылатын болады.
"Мұндай реформа жасауға өмірдің өзі итермелеп отыр. Бұл қызметтің мамандарын әлеуметтік қорғау және кадрларды дайындау жүйесі қайта қаралады. Бұған қоса инфекциялық аурулармен күрес саласында шет елдермен ынтымақтастықты одан ары нығайту қажет. Биологиялық қауіпсіздік жүйесі ортақ стандарт бойынша жұмыс істеуге және қатерлерге еларалық өзара іс-қимыл мен қарсы тұру шараларын қамтамасыз етуге тиіс", – деді Қасым-Жомарт Тоқаев.
Мемлекет басшысының айтуынша, санитарлық-эпидемиологиялық қызметті күшейтіп, институттандыру қажет. Ол сондай-ақ жыл соңына дейін "биологиялық қауіпсіздік жөніндегі заңын" әзірлеуді тапсырды.

Карантин қатаңдауы мүмкін

Денсаулық сақтау министрлігі карантин шаралары мен экономиканы қатаңдатуды қаламайтынын, алайда карантин шараларын сақтай отырып қана жұмысты жалғастыра алатынын айтты. Әрбір адам мен мекеме сақтауы тиіс талаптар еленбесе науқастар саны артып, шараларды қатаңдатып, қосымша санкциялар салуға тура келеді.
"Әрине, бұлай болғанын қаламаймыз. Пандемиямен күрес әр азаматқа тәуелді болып отыр. Бұл індет әлі біткен жоқ. Коронавирус толқынды жағдаймен келе жатыр. Карантин жағдайында төмен түседі. Бірақ карантин және шектеу шараларын алып тастасақ қайта көтеріледі. Қазақстанда ғана емес, бүкіл дүние жүзінде қауіпті жағдай болып отыр. Мұны барлығымыз дұрыс түсінуіміз қажет", – деді Денсаулық сақтау министрі Елжан Біртанов.
Оның сөзінше, кәсіпорындар мен қоғамдық көлікте әлеуметтік арақашықтық, санитарлық режимнен бөлек, жеке гигиенаны сақтау өте маңызды. Министр инфекцияның таралмауы үшін маска тағу қажет екенін атап өтті.

Оқи отырыңыз: 42 500 теңге әлеуметтік төлемге шетелге көшкендер мен түрмедегілер де өтініш берген

Елжан Біртанов коронавирус жұқтырғандардың неге көбейгенін түсіндірді

Осы күнге дейін тіркелген науқастардың басым бөлігі – 85% жеңіл ауырған, ауру белгілері болмаған. Ал кейбір мемлекеттерде ондай науқастарды есепке алмайды. Қазақстандағы тәртіп бойынша барлық науқас статистикаға енгізілетіндіктен науқастардың саны өскен.

Денсаулық сақтау министрі Елжан Біртанов бұл аурудың таралуының алдын алу мақсатында жасалатынын, себебі ондай науқастарды тауып, оқшауласа, эпидемияны тоқтатуға мүмкіндік бар екенін айтты.

"Ауру белгілері жоқ адамдар да инфекцияны басқарларға жұқтырады. Сол себепті Дүниежүзілік денсаулық сақтау ұйымы осы санаттағы науқастарды оқшаулауға кеңес беріп отыр. Бұрын біз оларды ауруханаға жатқызсақ, қазір мүмкіндік болса, үйінде немесе арнайы карантиндік стационарларға жатқызып, басқалардан алшақ ұстауымыз қажет", – деді ол.

Қазақстанда тіркелген барлық науқастың 13%-і, яғни 543 адам орташа жағдайда болса, 1,5%-і немесе 58 науқас ауыр жағдайда жатыр. 19 адам жасанды тыныс алдыру аппаратына қосылған.

Қазақстан зертханалары тәулігіне 25 мыңға дейін Covid-19 тестін ала алады

Денсаулық сақтау министрі Елжан Біртанов ауруды эпидемиологиялық түрде қадағалауға мүмкіндік беретін профилактикалық тестілеу жүргізіліп жатқанын атап өтті. Сондай-ақ, президент тапсырмасымен зертханалардың мүмкіндіктері күшейтілгенін хабарлады. Қазіргі таңда зертханалар тәулігіне 25 мыңға дейін тест ала алады, ал бұған дейін зертханалар коронавирус инфекциясына тәулігіне 4 000 тест алудан бастаған еді.


Оқи отырыңыз: 42 500 теңге тағайындалмаған азаматтардың өтініші қайта қаралады. Ол үшін не істеу керек?


Бюрабекова Алматы қалалық орталық клиникалық ауруханасына барды

Денсаулық сақтау вице-министрі Людмила Бюрабекова медицина қызметкерлерінің коронавирусты жаппай жұқтыруына қатысты проблемалық мәселелерді шешу және жол берілген бұзушылықтарды жою жөніндегі комиссияның шешімімен танысу үшін Алматы қаласының орталық клиникалық ауруханасының басшылығымен және медициналық қызметкерлерімен кездесті.

Комиссия мүшелеріне осы жылғы 5-15 мамыр аралығында жүргізілген тексеру қорытындысы хабарланды. Объективтілік үшін тергеу нәтижелері комиссия анықтаған қорытындыларды құқықтық бағалау үшін құқық қорғау органдарына жіберілді.

Кездесуде вице-министр мен комиссия мүшелері қызметкерлерді тыңдап, сұрақтарға жауап берді.


Фото: Коронавирустың таралуына қарсы әрекет ететін Алматы ақпараттық алаңдарының ресми желісі

Орталық қалалық клиникалық аурухана бас дәрігерінің міндетін уақытша атқарушы Гүлнар Құлқаеваның айтуынша:
  • өз еркімен 10 қызметкер жұмыстан кеткен;
  • 1 маусымға дейін сауығып шыққан 143 қызметкер жұмысқа орналасуын күтіп отыр;
  • 1 маусымнан 15 маусымға дейін қалған қызметкерлер жұмысқа шығуға дайын.
Медициналық қызметкерлер № 4 қалалық клиникалық ауруханасындағы, № 7 қалалық клиникалық ауруханасындағы, жедел жәрдем қалалық ауруханасындағы бос орындарға орналасады. Жұмыссыз дәрігерлер жұмыссыздық жүрген кезеңінде жергілікті бюджет есебінен орташа жалақы төленеді.

Блок бекеттегі көлік апаты: үш лауазымды қызметкер жұмыстан кетті

25 мамырда екі полиция қызметкері қаза тапқан Алматы облысындағы блок бекеттегі қайғылы оқиғаға қатысты қызметтік тескеру жүргізіліп, нәтижесінде ішкі істер министрі Ерлан Тұрғымбаевтың бұйрығымен 9 қызметкерге тәртіптік жаза қолданылды. Үш адам қызметтік орынынан кетті. Олар:
  • Алматы қалалық ПД патрульдік полиция полкі бастығының орынбасары, полиция подполковнигі К.Е. Сатаев;
  • Алматы қаласы ПД Кадр саясаты бөлімінің бастығы, полковник О.С Мырзабеков;
  • Жеке құрам инспекциясының бастығы, полиция полковнигі А.О. Ақылбеков;
Үш адамға ескерту жарияланды. Олар:
  • Алматы қаласы ПД Жергілікті полиция қызметінің бастығы, полиция полковнигі М.А.Саттаров;
  • Алматы қауіпсіздік басқармасының бастығы, полиция подполковнигі С.О. Көкрекбаев;
  • Алматы қалалық ПД бастығының орынбасары, полиция полковнигі А.А Нашарбеков.

Алматы қалалық Полиция департаментінің бастығы полиция генерал-майоры Қ.Д. Таймерденовке, оның орынбасары Н.С Алмасбековке, баспасөз қызметінің жетекшісі С. Әзірбекке де қатаң сөгіс берілді.

Алматы әкімі Бақытжан Сағынтаев қайтыс болған екі полиция қызметкерінің отбасына пәтер берілетінін айтты.

Бас санитар дәрігер маскасыз жүруге болмайтын орындарды айтты

Бас мемлекеттік санитарлық дәрігері Айжан Есмағамбетова бетперде киіп жүру не үшін қажет және карантиннің босаңсуы неліктен осыған байланысты екеніне жауап берді. Адам минут сайын 3-4 рет қолымен бетін ұстайды. Инфекция негізінен осындай жолмен тарайды. Бұл әрекеттер адам еркінен тыс жасалады, сондықтан маска тағуға ерекше назар аударылады.

Жабық орындарға барған кезде:

  • дүкендер;
  • азық-түлік базарлары;
  • азық-түлікке жатпайтын базарлар;
  • дәріхана;
  • сауда орталықтары;
  • адам көп шоғырланатын орындарда маска тағу міндетті.

Оқи отырыңыз: "Заңнама жүйесін жетілдіру қажет". Төтенше жағдай сабақтары туралы сарапшылар пікірі

Алматыда маска тақпағандарға айыппұл салынады

Әкімшілік құқық бұзушылық туралы кодексінің 462-бабының 3-бөліміне сәйкес, Алматы тұрғындары мен қонақтары көшеде және жабық жерлерде маскасыз жүргені үшін айыппұл салынады.

Осы бап бойынша карантин талаптарын бұзған кәсіпкерлерге айыппұл салынады:
  • шағын бизнес үшін – 100 АЕК;
  • орта бизнес үшін – 200 АЕК;
  • ірі бизнес үшін – 500 АЕК.


Алматыда науқас курсант коронавирусты бүкіл казармаға жұқтырған

Алматы әкімі Бақытжан Сағынтаев ҰҚК Шекара қызметі Академиясының коронавирус жұқтырған 54 курсанты туралы айтты. 15-29 жас аралығындағылар қауіп тобына жатады.
"Курсанттардың көпшілігі ауырды. Казармада жатқандардың барлығы ауырып шыққанша вирус тоқтамады. Казармада ауырған бір адамнан басқаларға жұқты", – деді әкім.

Алматыда қайтадан карантин енгізілуі мүмкін

Қала әкімі Бақытжан Сағынтаевтың сөзінше, эпидемиологиялық ахуал нашарлайтын болса, қала қайтадан карантинге жабылуы әбден мүмкін.
"Екі ай үйде шыдап отырған алматылықтарға алғыс айтамын. Бірақ 2 айда шыдам деген бітті. Төтенше жағдай режимі алынған соң бәрі сыртқа шықты. Әр облыста коронавирус көрсеткіші артып келеді. Олай болса қатаң карантин режимі қайтарылады. Күн өткен сайын ахуалды нашарлатуға болмайды. Бұған әрбіріміз жауапты болғандықтан карантин режимін сақтау керек", – деді ол.
Наурыздың соңында қалада 35 мың көлік жүрген. Ал карантинге дейін мұнда 500 мың қала тұрғынының, 250 мың облыс тұрғынының көлігі қатынаған.
"Көшеге шығуға рұқсат берсек те маска тағып, әлеуметтік арақашықтықты сақтау керек. Үлкен шараларды жасаудың қажеті жоқ. Біз балаларды ауруға шалдығу қатерінен қорғауымыз керек. Жақындарыңыздың да, өзіңіздің де өміріңіз, денсаулығыңыз осыған байланысты. Жауапкершілік жүгін сезіне білу керек", – деді Бақытжан Сағынтаев
Алматыда қоғамдық көлікке маскасыз жүргендерді кіргізбеу шешімі қабылданды. Сондай-ақ жабық ғимаратта, әлеуметтік арақашықтықты сақтау қиын – дәріхана, медицина ұйымы, кеңсе, ХҚКО және көлікте маска тағу керек.

Қостанай мен СҚО-да карантин қатаңдауы мүмкін

28 сәуірден бастап Қостанай облысында шектеу шараларын жеңілдетудің 4 кезеңі енгізілді. Алайда мұны көп адам карантин режимін алып тастау деп қабылдаған. Азаматтар мен кәсіпкерлік субъектілері тарапынан шектеу шараларын бұзу анықталды. Адамдардың денсаулығы мен өміріне қауіп төндіруге жол жоқ. Коронавирус эпидемиясы әлі жойылмады.

Облыста карантин режимін сақтауды арнайы мамандандырылған 40 топ тексереді. Әрі қарай шектеулер эпидемиялық ахуалға ғана емес, бірінші кезекте карантин режимін сақтауға байланысты жеңілдетіледі. Эпидемиялық жағдай нашарласа, қатаң карантин қайтарылады.

СҚО-да адамдардың жаппай жиналу нысандарына тексеру жүргізіліп жатыр.

Екі аптада 2 000 нысан тексеріліп, 227 бұзушылық анықталған. Өңір басшысы Құмар Ақсақалов тұрғындарды жағдайға жауапкершілікпен қарауға шақырды. Облыста ахуал нашарласа карантин режимін қатаңдатуға тура келетінін айтты.

Қазақстаннан жалпы сомасы 1 млрд теңгеге жуық маска шығарылмақ болды

Батыс Қазақстан облысындағы "Сырым" автокөлік өткізу бекетінде медициналық жеке қорғаныс құралдарын заңсыз шығармақ болған 15 жүк көлігі ұсталды. Тексеріс кезінде құны 2,2 млн АҚШ доллары (1 млрд теңгеге жуық) сомасына тең 1 млн-нан астам жеке қорғаныс құралы (медицина маскасы, респираторлар және т.б) анықталды.
Мемлекеттік шекарадан өту кезінде тасымалдаушы салық төлеуден жалтару мақсатында жалған электрондық шот-фактураларды толтырған. Бұдан басқа, тасымалданатын тауарға рұқсат құжаттары болмаған. ЖШС басшысы серіктестіктің тіркеуіне және қаржы-шаруашылық жұмысына қатысы жоқ болып шықты.

Өзіңізге ыңғайлы жерден informburo.kz оқыңыз:

Facebook | Instagram | Telegram

Если вы нашли ошибку в тексте, выделите ее мышью и нажмите Ctrl+Enter