Олар Фатих Сұлтан Мехмет емханасына жатқызылды.
Ыстанбұл әуежайында ұшақтың жайсыз қонуы салдарынан Қазақстанның екі азаматы зардап шекті деп хабарлайды Сыртқы істер министрлігі.
Хабарламада "Қазақстанның Ыстанбұлдағы бас консулдығы берген мәлімет бойынша, 5 ақпан күні жергілікті уақыт бойынша кешкі сағат 18.00-де Ыстанбұл әуежайында ұшақтың қатты қонуы салдарынан Қазақстанның екі азаматы зардап шекті. Олар Фатих Сұлтан Мехмет емханасына жатқызылды" делінген.
Оқи отырыңыз: Тұтынушылардың құқықтарын қорғау комитеті Bek Air компаниясын сотқа берді
Сыртқы істер министрлігінің мәліметінше, қазір бас консулдық жарақат алған екі азаматқа жан-жақты көмек көрсетіп жатыр.
Қайғылы жағдай Ыстанбұлдағы Сабиха Гёкчен халықаралық әуежайында болған. Измирден Ыстанбұлға бағыт алған Pegasus әуе компаниясының Boeing-737-800 ұшағы қонар кезде ұшып-қону жолағының аймағынан шығып кеткен. Ыстанбұл қаласының әкімі Әли Ерлікай ұшақтың жайсыз қонуына ауа райының қолайсыздығы себеп болғанын айтады.
Апат салдарынан әуе кемесі үшке бөлінген. Түркияның денсаулық министрі Фахреттин Қожа апат салдарынан 3 адам қаза тауып, 179 адам жарақат алғанын мәлімдеді.
