Тұтынушылардың құқықтарын қорғау комитеті Bek Air компаниясын сотқа берді

Сауда және интеграция министрлігінің тұтынушылардың құқықтарын қорғау комитеті 31 қаңтарда Нұр-Сұлтан қаласының сотына Bek Air компаниясының қызметіне байланысты тұтынушылар құқықтарының бұзылуы туралы талап арыз берді. Бұл туралы комитеттің баспасөз қызметі хабарлады.

Шағымданған 20 адам жалпы сомасы 444 434 теңгеге Вek Air әуе компаниясының билеттерін сатып алған.

Комитет төрағасы Азамат Ахметов билет ақшасын қайтара алмай жүрген азаматтардың ведомствоның келесі телефон номеріне хабарласуына болатынын айтты: 8 (7172) 74-98-36, 74-98-32.

Оқи отырыңыз: Сауда министрі Қытайдан тауар импорты тоқтамағанын хабарлады

Оның сөзінше, тұтынушылардан жиналған ақпаратпен сотқа ұсынылған талап арызды толықтыруға мүмкіндік бар.

"Тұтынушылардың құқықтарын қорғау туралы заңға сүйеніп, Bek Air көрсетпеген қызметтің ақшалай қаржысын өндіріп алу үшін сотқа талап арыз бердік. Сотта тұтынушылардың құқығын қорғаймыз. Bek Air сотқа жауапкер ретінде шақырылады", – деді комитет төрағасы.

Еске салайық, Bek Air әуе компаниясы 27 желтоқсан күні Fokker-100 ұшағы апатқа ұшырағаннан кейін қызметін уақытша тоқтатты. Апаттан 12 адам көз жұмды.

Ұшақ апаты туралы барлық материалдарды мына жерден оқуға болады.