Сенат депутаты: Газет атаулының күні – өлмешінің күйі

Сенат депутаты Нұртөре Жүсіп Facebook желісінде бұқаралық ақпарат құралдарының мәселесін көтерді. Оның жазуынша, санда болғанымен санатта жоқ журналистер корпусы қазір ең қорғансыз салаға айналған.

"Қазір газет атаулының күні – өлмешінің күйі. "Шықпа, жаным, шықпа" деумен отыр. Аудандық газеттерден бастап республикалық басылымдар қымбатшылық зардабын тартып келеді: жалақысы да, қаламақысы да мардымсыз. Әлеуметтік пакет атаулыдан жұрдай, қоғамдағы мәртебесі анықталып, бекітілмегеннен кейін сайда саны, құмда ізі жоқ жалаңаш, қауқарсыз, қорғансыз қауымға айналып барады", – деп жазды Нұртөре Жүсіп.

Оқи отырыңыз: 

• Сенатор ішімдік ішкен әншілерді сахнадан 5 жылға аластатуды ұсынды
• Сенат депутаты "Тәлім ТВ" мен "Ел Арнаны" жасөспірімдер арнасына айналдыруды ұсынды

Депутаттың ойынша, қазақ қоғамының қызуы қай дәрежеде екенін білу үшін жарыққа шығып жатқан қазақ баспасөзіне арнайы мониторинг жүргізсе жеткілікті. Соңғы отыз жылда қоғамды толғандырған мәселелер мен кетіп жатқан кемшіліктер – бәрі баспасөз бетінде тұр.

"Қазір "ақпараттық майдан" жүріп жатыр деседі. Майданда мықты қару керек. Бізде қару да, қауқар да шамалы. Алдыңғы шепте жүрген журналистер жалаңаяқ жар кешіп, қызылаяқ қар кешіп осылай жүре бере ме", – деді сенатор.