Президент Қасым-Жомарт Тоқаев Digital Bridge форумында жасанды интеллектінің қарқынды дамуына байланысты Қазақстан өңірлерін сапалы интернетпен қамтамасыз ету ісін жеделдету керектігіне тоқталды.
"5G желісін кең көлемде енгізу инновацияның дамуына тың серпін береді. Бұл процесс Қазақстанда қазірдің өзінде жүріп жатыр", – деген мемлекет басшысы Үкіметке бұл міндетті орындауды жеделдетуді тапсырды:
"2027 жылға дейін барлық облыс орталықтарын ұялы байланыстың жаңа буынымен қамту міндеті бұған дейін жүктелген болатын. Алайда технологияның қарыштап даму жағдайында біз де қарқынды арттыруымыз керек. Үкімет бұл жұмысты мерзімінен бұрын, яғни 2025 жылдың соңына дейін аяқтауы қажет. Әрине, мерзімнің өзгеруі көрсетілетін қызметтердің сапасына әсер етпеуге тиіс".
Сондай-ақ, мемлекет басшысы төменгі орбитадағы спутниктік жүйелердің мүмкіндіктерін пайдалана отырып, шалғай аудан тұрғындарын интернетпен қамтамасыз ету маңызына да тоқталды.
Оқи отырыңыз:
- Президент 2 жылда жасанды интеллектіге маманданған дата-орталықтар салуды тапсырды
- 2024 жылы Қазақстанда Ұлттық жасанды интеллект платформасы іске қосылады
