Алматыда автокөлік шығарындыларына жүргізілген мониторинг аясында №3 коммуналдық автобус паркі тексерілді. Бұл туралы Eco Almaty ЖШС өкілдері хабарлады.
Мамандардың мәліметінше, автопаркте тіркелген 289 автобустың 40-ы жөндеуде болған. Тексеру барысында қалған 249 көлік қаралып, олардың 50-інде пайдаланылған газдарды тазартуға арналған негізгі құрылғы – катализатор жоқ екені анықталды.
"Мониторингнің басты мақсаты – атмосфералық ауаны қорғау талаптарының сақталуын қамтамасыз ету және қаладағы негізгі ластаушы көздердің бірі саналатын автокөлік шығарындыларын азайту", – делінген хабарламада.
Сонымен қатар, Алматы қаласының Экология департаменті бірқатар автокөлік кәсіпорындарына жоспардан тыс тексеру жүргізген. Атап айтқанда, NEO City TRANS ЖШС мен TALAP T ЖШС автобус парктерінде жүргізілген өлшеулер кейбір көліктерде зиянды шығарындылардың белгіленген нормадан асып кеткенін көрсетті.
"Анықталған заңбұзушылықтар бойынша ҚР Әкімшілік құқықбұзушылық туралы кодексінің 333 және 334-баптарына сәйкес әкімшілік хаттамалар рәсімделіп, жалпы сомасы 13,3 млн теңге айыппұл салынды. Сондай-ақ кәсіпорындарға анықталған кемшіліктерді жою туралы нұсқамалар берілді", – делінген хабарламада.
Мамандар экологиялық талаптардың сақталуын бақылау алдағы уақытта да тұрақты түрде жалғасатынын атап өтті.