5 млн теңге жәрдемақы, пайызы аз несие. Ауыл дәрігерлеріне тағы қандай қолдау бар?

Ауылға келген дәрігерге жергілікті бюджет есебінен 1 млн теңгеден 5 млн теңгеге дейін көтерме жәрдемақы беріледі. Медициналық кадрларды ауылға тарту үшін білім беру гранты бойынша оқуға түскен түлектерге үш жыл жұмыс істеу міндеті жүктелген. Бұл туралы премьер-министр Әлихан Смайылов Сенат депутаттарының сауалына берген жауабында айтты.

Үкімет басшысының мәліметінше, "Дипломмен – ауылға" мемлекеттік бағдарламасы бойынша 2022 жылы 4 мың маманға – 18,1 млрд теңге сомасына тұрғын үй сатып алуға бюджеттік кредит, 7,8 мың маманға 2,4 млрд теңге сомасына көтерме жәрдемақы берілген.

"Бүгінгі күні орталық мемлекеттік органдар ауылдық жерлерге жұмысқа орналасуға жіберілген мамандар үшін көтерме жәрдемақылар мен тұрғын үй сатып алуға жеңілдікті кредиттердің мөлшерін ұлғайту бөлігінде жас мамандарға әлеуметтік қолдау шараларының пакетін біріздендіру мәселесін пысықтауда", – деп жазды Әлихан Смайылов.