2024 жылы әлеуметтік төлемдер бюджет шығыстарының 22 пайызын құрады

2024 жылы республикалық бюджеттен әлеуметтік төлемдерге 5,3 трлн теңге бағытталды, бұл еліміздің бюджет шығыстары жалпы көлемінің 22 пайызын құрады. Бұл қаражат зейнетақы мен жәрдемақы алатын 4,5 млн азаматқа, оның ішінде 2,4 млн зейнеткер мен 2,1 млн түрлі әлеуметтік төлем алушыларға бөлінді, деп хабарлады Үкіметтің баспасөз қызметі. 

"Мемлекет басшысының тапсырмасы бойынша 2023 жылдан бастап бес жыл ішінде ең төменгі базалық зейнетақыны ең төменгі күнкөріс деңгейінің 70 пайызына дейін, ең жоғарғысы – 120 пайызға дейін жыл сайын кезең-кезеңімен арттыру жүзеге асырылады. Мәселен, 2024 жылғы 1 қаңтардан бастап базалық зейнетақының ең төменгі мөлшері ең төменгі күнкөріс деңгейінен 60 пайыздан 65 пайызға дейін өсті, бұл 28 215 теңгені құрайды, ең жоғары мөлшері – ең төменгі күнкөріс деңгейінен 100 пайыздан 105 пайызға дейін, бұл 45 578 теңгені құрайды", – делінген шолуда.

Еңбек және халықты әлеуметтік қорғау министрлігі де өскелең ұрпақтың болашақ зейнетақылары деңгейін арттыру бағдарламасын жүзеге асыруды жалғастырды. 2024 жылғы 1 қаңтардан бастап жұмыс берушілердің міндетті зейнетақы жарналарын кезең-кезеңімен іске асыру басталды, олар жұмыс істейтін 4,3 миллионнан астам азаматтың шотына аударылды. 

2024 жылы зиянды еңбек жағдайында ұзақ уақыт жұмыс істейтін азаматтарды әлеуметтік қолдауға ерекше назар аударылды. Жаңа арнайы әлеуметтік төлем енгізіліп, ол 2024 жылдың 1 қаңтарынан бастап 13 мың адамға тағайындалды.

Оқи отырыңыз: 2025 жылы зейнетақы, жәрдемақы және әлеуметтік төлемдер мөлшері қалай өзгереді