Қазақстандықтар жаңа жылды әдетте пост-кеңестік елдердің азаматтары сынды отбасымен қарсы алуды жөн көрсе, америкалықтар алып қалаларға барады. АҚШ-тың шығыс бөлігіне жақын штаттарда тұратындар Нью-Йорк қаласында жаңа жылды қарсы алуды жоспарласа, батыстықтар Лос-Анджелес қаласына аттанады. Ал орталық аймақтардағы америкалықтар, яғни мидвест штаттарының тұрғындары Чикагоға бет алады екен.
Әуе билеттері мен қонақ үй нөмірлерін брондау қызметін ұсынатын Skycanner атты онлайн платформасы 2020 жылдың қарсаңында сайт қолданушылары арасындағы ең танымал бағыттар тізімін жариялады. Олардың қатарында біз келген Чикаго қаласы үшінші орында тұр.
Чикаго өзінің қақаған суығымен белгілі. Қаңтар айының ортасына қарай қысқы температура Мичиган көлінен соғатын желдің есебінен бірнеше есе өседі. Десе де, суық жел мен қалың қар туристердің жаңа жылды Чикаго көшелерінде қарсы алудан айыра алмайды.
Чикаго қаласының әкімдігі жыл сайын туристер санын тарту үшін түрлі концерттік бағдарламалар дайындап, ойын-сауық орталықтарының қызметін жақсартып отырады. Мысалы, өткен жылы алып қалаға 58 миллион турист келіпті. Ал жаңа жыл қарсаңы тағы да туристерді тартудың тағы бір себебі.
Оқи отырыңыз: Детройттағы қазақ: "Көліктер жүріп жатыр, демек тіршілік те бар"
Кез келген алып қалалардағы жаңа жылдық бағдарламаға мән берсеңіз, ол отшашумен басталады. Чикаго әкімдігі де жыл сайын қала ішінен өтетін Чикаго өзені бойында және Мичиган көлінің жағасынан отшашу ұйымдастырады.
Сол себепті де Чикагоның қаржы орталығындағы Миллениум саябағында түрлі концерттік бағдарламалар мен жаңа жылдық шоулар ұйымдастырылады. Сондай-ақ, туристер осы бақта тұрып, жаңа жылдық отшашуды тамашалай алады.
Оқи отырыңыз: Эльдорадо қазынасы мен Будда мүсіндері. Метрополитен өнер музейінен фоторепортаж
Әрине, жаңа жыл қарсаңында ауа-райы минус температураның көрсетіп тұрғандықтан, жылы киінгеніңіз жөн. Десе де, жаңа жылдық көңіл-күй мен жақындармен бірге уақыт өткізетін сәттер суық температураны ұмытуға жетелейтіні анық.
Оқи отырыңыз: "Model T"-ден Мустангқа дейін: Генри Форд жетістігінің сыры. Фоторепортаж
Чикаго қаласының әкімдігі қала орталығында әлемдік деңгейде жаңа жылдық шоу бағдарламасын 2015 жылдан ұйымдастыра бастаған екен. Сол жылдан бері шоуды онлайн түрде тарату мүмкіндіктері де қарастырылыпты.
Мысалы, өткен жылғы бағдарламаның тікелей эфирден 1.66 миллион адам тамашалаған. Олар АҚШ-тың 39 штатынан және шет елдерден тіркелгендер екен.
Оқи отырыңыз: Motown, GM Renaissance және Belle Isle Park. Детройтта туристер баруға тиіс 7 жер
Қала басшылығының туристерді тартатын бағдарламалар мен оларды танымал ету бойынша жасалып жатқан жобалары өз нәтижесін бере бастаған. Мысалы, жаңа жылды Чикагоның Миллениум саябағында қарсы алатындар саны өткен жылы 90 мыңға жеткен. Ал Kayak туристік онлайн қызметінің есебінше, жаңа жылды қарсу алуға ұшатын әлемдік қалалар тізімінде Чикаго ондыққа енген.
Оқи отырыңыз: Нью-Йорктегі туристер көп келетін көрікті мекендер. Фоторепортаж
Жаңа жыл қарсаңында алып қаладағы қонақ үйлер мен ресторандан өздерінің жеке бағдарламаларын жариялайды. Өз қызығушылығыңызға қарай таңдау жасай аласыз. Бағалары да қолжетімді.
Миллениум саябағы мен Чикаго өзенінің бойында отшашуды тамашалау тегін. Ал сізге джаз ұнаса, The Green Mill дәмханасына баруға кеңес береміз. Әр адамға кіру құны 30 АҚШ долларынан басталады.
Ал билейтін ортасы бар жастарға да жаңа жылды қарсы алатын орталықтар бар. Мысалы, Чикагодағы ең танымал Париж түнгі клубы таңғы уақытқа дейін жұмыс істейді.
Чикагодағы туристер арасында жаңа жылды Лас-Вегас стилінде қарсы алғысы келетіндер де бар екен. Мұндай сұранысты Дрейк қонақ үйі жыл сайын ұйымдастырады.
Жоғарыда айтқанымыздай, Чикагоның өзге бейресми атауы – "желді қала". Сондықтан, қаланың биік ғимараттары көбірек шоғырланған қаржы орталығы аймағында ғана жаяу жүргіншілерді кездестіресіз. Ал қаланың басқа бөліктері, әсіресе, түнгі уақытта бос қалған сияқты көрінеді. Бірақ көлік және қоғамдық транспорт қозғалысы тоқтаған емес.
Чикаго биік ғимараттар қаласы деп те атайды. Себебі, мұнда 300-ге жуық биік ғимарат бар екен. Ал олардың үстінен қарау әрбір туристке қызық болары анық. Сол үшін де келушілердің көп бөлігі Уиллис Тауэр ғимаратындағы SkyDeck көрінісіне барады. Кіру бағасы – $24.
Ал дәл сондай көріністі тегін көргіңіз келсе, онда сізге Джон Хенкок ғимаратына бару қажет. Ғимараттың 96-қабатында орналасқан The Signature Room барына тегін кіріп, жоғарыдағы суреттегідей тамаша көріністі тамашалай аласыз. Ал бұл көрініспен жаңа жылды қарсы алғыңыз келсе, әр адам басына кіру бағасы 30 АҚШ долларынан басталады. Бұл сомаға бардың авторлық коктейлі кірген.
