Қазақстанда психологиялық қызмет көрсету ережелерін бұзған мамандарға әкімшілік жауапкершілік енгізу ұсынылуда. Бұл түзетулер бүгін Мәжілісте "Психологиялық қызмет туралы" заң жобасы аясында талқыланды.
Мәжіліс депутаты Ирина Смирнова заң жобасына сәйкес, психологиялық қызметпен тек мемлекеттік тізілімге енгізілген мамандар айналыса алатынын айтты. Ол сондай-ақ тізілімге енбеген мамандар психологиялық көмек көрсеткен жағдайда туындауы мүмкін тәуекелдерге назар аударды.
Депутат психологиялық қызмет көрсету нәтижесінде адам денсаулығына зиян келген жағдайда қандай жауапкершілік қарастырылғанын сұрады. Мәжіліс депутаты Айна Мысырәлімова жауап ретінде қолданыстағы заңнамада мұндай жағдайлар үшін Қылмыстық кодекске сәйкес жауапкершілік қарастырылғанын түсіндірді. Зиянның ауырлық дәрежесіне байланысты, әдейі зиян келтірілген жағдайда, айыппұлдардан бастап, бас бостандығынан айыруға дейінгі шаралар қолданылуы мүмкін.
Оқи отырыңыз: Қазақ фильмдеріндегі Red және Green flag. Психологиялық терминдер қалай әлеуметтік трендке айналды
Заң жобасын талқылау барысында депутаттар психологиялық көмек көрсету саласындағы заңнама талаптарын бұзғаны үшін жеке әкімшілік жауапкершілік енгізу қажет деген қорытындыға келді.
"Қазіргі уақытта біз психологиялық көмек көрсету тәртібін бұзғаны үшін айыппұл санкцияларын қарастыратын түзетулерді талқылап отырмыз. Айыппұл мөлшері әлі де қарастырылып жатыр, екінші оқылымға дейін оларды пысықтаймыз", – деді Айна Мысырәлімова.