Қазақстан онкологтары мен радиологтарының съезі аясында Алматыда хирургиялық шеберлік сағаттары басталды

Алматыдағы Қазақ онкология және радиология ғылыми-зерттеу институтының базасында Қазақстан онкологтары мен радиологтарының X Халықаралық съезі аясында хирургиялық шеберлік сағаттары басталды.

Тәжірибелік бағдарлама институттың жетекші мамандарын және шетелдік сарапшыларды біріктірді, олар онкологиялық ауруларды хирургиялық емдеудің заманауи тәсілдерін аз инвазивті және жоғары технологиялық әдістерді қолдана отырып көрсетті.

Шеберлік сағаттары операциялық бөлмелерден тікелей трансляция форматында өтті, бұл Қазақстанның әртүрлі аймақтарынан және шетелдерден келген дәрігерлерге операциялардың барысын нақты уақыт режимінде бақылауға және заманауи хирургиялық технологиялармен танысуға мүмкіндік берді. Шеберлік сағаттарының барысында заманауи онкохирургияның дамуының өзекті үрдістерін көрсететін операциялар ұсынылды:

• Асқазан қатерлі ісігі кезіндегі 3D-лапароскопиялық операциялар. Операцияны ҚазОжРҒЗИ торакоабдоминалды онкология орталығының басшысы, жоғары санатты онколог-хирург Ақжол Қабдоллаұлы Дүйсембаев жүргізді.
• Бүйректің лапароскопиялық резекциясы. Заманауи органды сақтау әдістерін ҚазОжРҒЗИ онкоурология орталығының басшысы, PhD, MBA Хусан Талипбайұлы Умурзаков көрсетті.
• Өкпенің перифериялық қатерлі ісігі кезіндегі лимфодиссекциямен торакоскопиялық жоғарғы лобэктомия. Операцияны ҚазОжРҒЗИ торакоабдоминалды онкология орталығының онколог-хирургі Бауыржан Оспанұлы Иманбеков орындады.
• Паренхиматозды органдардың ісіктерін емдеудің аблятивті әдістері. Шеберлік класын ҚазОжРҒЗИ интервенциялық хирургия қызметінің басшысы Ілияс Ержанұлы Нұрсейітов және шақырылған халықаралық сарапшы – клиникалық профессор, интервенциялық радиолог Bat-Ireedui Purevbaatar (Mongolia Japan Hospital, Моңғолия) өткізді.

Шеберлік сағаттарын өткізу тәжірибелік дәрігерлер үшін маңызды білім алаңына айналды. Мамандар озық хирургиялық технологиялармен, онкологиялық ауруларды емдеудің заманауи тәсілдерімен және халықаралық клиникалық тәжірибелермен танысуға мүмкіндік алды. Мұндай білім беру форматтары дәрігерлердің біліктілігін арттыруға, кәсіби ынтымақтастықты дамытуға және Қазақстанның онкологиялық көмек жүйесіне заманауи технологияларды енгізуге ықпал етеді.

Еске салайық, Қазақстанның онкологтары мен радиологтарының X халықаралық съезі 2026 жылғы 12-14 наурызда Алматыда өтіп, онкология, радиология және ядролық медицина саласындағы жетекші мамандарды біріктіреді.