Патронат тәрбиешілердің жалақысы екі есе артты

Балалардың құқықтарын қорғау комитетінің бастамасымен биыл маусым айынан бастап патронат тәрбиешілердің қызметтеріне төленетін төлемақы артты. Бұл туралы оқу-ағарту министрлігінің баспасөз қызметі хабарлады.

Бұрын төленетін ақы 60 мың теңге болса, енді әлеуметтік аударымдарды қоса есептегенде 120 мың теңге шамасында алады.

"Жетім балалар мен ата-анасының қамқорлығынсыз қалған балалардың отбасылық құрылымы – мемлекеттік саясаттың басым бағыттарының бірі. Біздің ойымызша, патронат тәрбиешілердің қызметтеріне төленетін ақыны арттыру осы отбасыларда тәрбиеленетін балалардың өмір сүру деңгейін жақсартады", – деді комитет төрайымы Насымжан Оспанова.

Бүгінде елімізде отбасылық орналастырудың төрт балама түрі бар: бала асырап алу, қорғаншылық (қамқоршылық), патронат және қабылдаушы отбасы. Айта кетейік, интернат ұйымдарында 3 мыңнан астам жетім және ата-анасының қамқорлығынсыз қалған бала тәрбиеленіп жатыр.